【士㞗彈系列】《她被寄宿到鹽水男孩的家中》2K15中: K851

我：「健仔，嚟啦，要開始我哋嘅二萬五千里長征。」由於呢條友要溝女又要返工，返工嗰陣又成日有燒烤嘢食，所以決定同我擺爛一齊搬炭就算。
U：「小題大做，有幾重呀？」身體健康強壯嘅女班長，左右手各搦兩包炭向橫伸展，做出類似十字懸垂嘅動作，外挺嘅胸部盡顯霸氣，可惜密實嘅衣著遮住晒啲胸肌。
一早就話咗佢正，如果有機會嘅話點都要同佢打次裸體摔角先此生無憾，希望QQ會批准進行呢個荒唐嘅活動。
慕：「因住呀，如果整親隻手到時打唔到鼓點算呢？」
U：「放心，我唔會賴地硬嘅，如果出唔到場我會主動認輸。」佢講完成句嘢先放低四包炭。
大姐，妳要喺度讕型係易呀，陣間都唔知要搦幾耐先去到燒烤爐，琴日由地下搦上課室已經成隻嘢咁。
校巴嚟到就上車，由於唔想啲炭整污糟地方兼夾阻住人上車，我同健仔就被安排最後上…同啲先生坐埋一齊，包括正副班主任加訓導一個。呢啲場合最啱就係進行校巴指定動作，瞓覺，而健仔都好同意呢個熱身運動，唔知佢琴晚攪過啲乜嚟一返到學校就係咁打喊露。
兩班同學，加埋七個先生，七十幾人嚟到流水響度過一個充實嘅旅行日…第一個節目就係落車喺郊野公園入口聽訓導攞住大聲公手中的廢噏，重要露晒天俾太陽曬，但企喺度都瞓到。
「各位同學，呢度就係你哋今日嘅旅行地點喇，大家大個仔大個女都知有乜規矩㗎啦，首先唔可以私自離開呢個入口，活動範圍就係水塘同埋沿住水塘嘅地方，無老師准許嘅話唔准自己上山，唔好亂拋垃圾，唔好掟嘢落水塘，唔好玩水…，…，而你哋都係讀理科嘅，燒烤應該難唔到你哋，但都係要注意安全第一。」屌，既然知規矩重講咁多廢話嚟做乜，又無講唔准縱火喎，同埋桑林野合…
「重有今日係俾你哋嚟郊遊嘅，所以請唔好喺度玩電話game，亦唔好喺度溫書，但係電話要開著，萬一老師搵唔到你哋嘅話係有機會隨時打畀你哋。」…。




晨咁早舟車勞頓已經夠攰，而家直頭想是但搵草披瞓覺就算。聽完廢話已經十點咁滯，幾好，陣間燒嘢食似返食晏晝而唔係食早餐。流水響呢度細細地，行三分鐘已經見到個所謂嘅水塘，同埋有堆燒烤爐。
易：「好！我哋就霸呢度啦！」通常中學生成班去玩，總會有人諗都唔諗就搶咗個最方便嘅位置，食嘢就最快起筷先，呢度都唔例外，佢夾埋隔籬班幾個band友同其他人一嘢就坐低，呢度得四個吉爐坐唔晒所有人，所以我同健仔放低咗三包炭畀佢哋繼續行入去。