【士㞗彈系列】《她被寄宿到鹽水男孩的家中》2K15中: K854

我：「點著粒炭精，然後求祈掉落去就是了。」
V：「咁樣？」佢左手夾住粒炭精，右手揸火機試圖點火…
我：「咪呀！」邊有人坐到遠一遠嚟點炭精㗎，唔識嘅…
U：「為咗佢哋安全著想，所以都係由你嚟啦。」
結果我喺自己個爐度夾咗條火炭過嚟算。
「仆街！燒緊㗎，咪破壞我哋個爐嚟走去溝女！」呢啲人係唔識飲水思源嘅，又唔諗下當初個火係邊個起嘅。
Q：「喂！咪整冧我啲炭呀！」
我：「起咁靚做乜，陣間燒燒下就散㗎啦，嗱，而家掉埋啲炭精落去啦，無用㗎喇。」
V：「噓，噓，噓！」三粒炭精就咁被浪費掉了。
我：「然後搵紙碟撥兩嘢，個火十秒鐘就大㗎喇。」




U：「哦，好呀。」然後佢隨即起手…
Z，V：「呀！救命呀！咳咳…咳！」
我：「喂！下面個窿呀！要等啲空氣由下面升上去…」
搞笑…明明Phy，Chem咁高分，點會唔識燒嘢食㗎…
「爽兄…可唔可以過嚟睇下呀…」妖，係仔嚟嘅。
我見到一大排炭，然後上面放住三粒炭精孤獨地燒，好似煮炭精咁，而佢哋黐埋一齊燒得好快…
F：「爽哥哥，唔爭在啦，對你嚟講都係舉手之勞。」
結果，我rearrange下四個爐啲炭，全部我搞掂晒。
我：「唉，辛苦晒，終於可以開始燒嘢食。」
「扮嘢啦你，明明就喺度溝女，重好意思話辛苦。」




我：「溝女？講就易，你咪試下過去幫佢哋燒嘢食囉，話唔埋有斬獲㗎。」我講事實咋，呢啲多人場合邊有咁易溝到女，就算露娜都要等無晒人先送上門啦。
都係燒早餐食先，有乜食乜啦，兩枝叉一枝兩塊厚切餐肉，另一枝係漢堡扒，燒熟就換兩塊面包，轉轉轉三十秒就已經金黃，最後放塊芝士喺面，兩邊包互托到半溶就會黐住，最後夾埋啲餐肉同漢堡扒就搞掂。
其實係好味嘅，簡單快脆又夠晒無益，燒嘢食唔一定要燒扒嘅，平平地一樣可以有好高享受；正如玩女唔一定要搵幽蘭，露娜妹妹都可以令人好舒服。
除非你有得同女神同居，否則唔建議你摏個頭埋去追。
望住佢哋燒嘢食真係烏里單刀七零八落，麪包會燶不在話下，見到塊餐肉因為拮得唔好而跌落炭度就更加心酸。
我：「呼，已經飽咗一半。」
豬：「喂！你條友好似無乜貢獻咁喎。」
我：「大佬，我要有乜貢獻，燒嘢食就梗係各自各㗎啦。」細龜拮咗六粒丸，啲丸幾大粒下又啱啱解凍，佢又唔敢放太埋驚燶，唔知熟未所以坐咗好耐都未有得食。
「講開又講，我哋呢圍好似有啲迫喎。」
「梗係啦，一個爐三張凳，坐七個人邊除得盡。」