【士㞗彈系列】《她被寄宿到鹽水男孩的家中》2K15中: K853

豬：「學校旅行係咁㗎啦，快啲呀，我哋全部未食早餐㗎。」其實…應該係同我生活作息有關，正如我覺得朝早溝女係唔多聚財嘅，所以朝早起身好少非禮QQ，要到咗放學時間先適宜處理呢啲情慾需要。
我：「正一弱者…先要食早餐，強人係連爐都唔使透㗎。」
豬：「點唔透呀，你係lab笠咗賓生burner出嚟呀？」
真係唔想服侍呢班男學生，想食嘢應該自己做㗎嘛。
我左望右望留意到有枱叔叔姨姨，似係行山撚嚟，男嘅已經停晒手喺度吹水，得返啲阿姨喺度玩火。
我：「幾位靚姐姐，早晨呀，介唔介意我用啲生炭嚟換你哋幾粒熟炭呀？」記住係姐姐，下一級就到婆婆。
「嗯？哥仔想點呀？」有個叔叔插嘴，處理我呢個不懷好意嘅來者不善。
我：「無呀，唔記得買炭精，想換幾粒熟炭透爐啫。」
「啊，幾醒目喎，咁都諗到，我哋差唔多㗎喇，唔使換直接攞啦，不過你小心啲喎。」躝得多街，就會見識到好多仆街會喺條街借火機點煙仔，呢啲原理可以廣泛應用。
然後我攞個夾，喺個爐中心夾咗嚿最大嘅；要記住金屬係會傳熱嘅，所以秘訣就係行得快好世界，走得靡就…




我：「搞撚掂！」我一嘢攝落去爐心，然後捽捽手指仔…
「你條仆街吖…竟然連炭都有得借，咁唔知醜嘅？」
我：「有無聽過子華神嘅無炭用呀？呢啲嘢無就要借㗎啦，你敢借嘅話，可能連人哋條女都借到返嚟。」
健：「喂喂喂…你咁樣望住我係乜意思呀？」
豬：「咪廢話啦，既然而家透咗爐就食嘢先。」
我：「話時話，你哋帶咗啲乜嘢食物嚟？」
龜：「有丸。」佢打開咗個背囊，係百佳嗰啲九十幾蚊有一公斤嘅台灣三寶丸，似乎個樣重解凍緊。
豬：「食早餐啦。」佢拎咗一條三罐嘅午餐肉出嚟，外加兩條唔同顏色嘅生命麪包。
我：「屌，你哋咁樣不如帶埋個煲嚟煮雜丸公仔麪咪算囉，燒乜鬼嘢食啫。
豬：「挑，叫你買嘢食嗰陣又話食乜都無所謂先是但買㗎咋，嗱，重有漢堡扒同芝士，祈望你整得好味過M記。」




你哋班友當我係乜吖…雖然我係識煮嘢食啫，都唔使…
Y：「死人交叉仔！」唔喺學校，呢幾隻嘢變得更加八婆。
豬：「娘娘嗌你呀！走啦！」
我：「妳哋…點樣呀，咁耐重未生火嘅，做咗啲乜？」
U：「咳咳，我哋研討咗幾分鐘搵邊個嗌你過嚟幫手。」
幽蘭拆開咗包炭精喺度玩，似乎呢粒黑黑啡啡嘅嘢比黃金鑽石更加新奇有趣，而QQ就喺度用夾幫啲炭玩JENGA。
J：「我哋覺得同實驗室一樣，呢啲嘢搵你嚟搞好似好啲。」佢兩個真係無一次負責點火㗎！