【士㞗彈系列】《她被寄宿到鹽水男孩的家中》2K15中: K862

K：「吃不到的葡萄是酸的，睇死你點都唔會追到茜旎。」哎，救命，係咪個個有少少樣嘅女就係咁毒舌？
我：「我想講我一早就放棄咗㗎喇，人哋一早就有男朋友，咁我又點會追到呢，不過睇住佢有仔重日日咁樣同叉仔玩，我認為佢有啲不守婦道，有佢做女朋友隨時可能要喊三聲，希望佢條仔乜都唔知。」
K：「如果人哋不守婦道嘅對像係你，唔知你重會唔會咁口響呢？」
我：「有乜可能吖，而且我相信佢都只係為咗消遣叉仔，呢啲女神點會自貶身價賣大包。」
K：「呵，結論係，無論人哋係點你繼續成日昅佢哋。」
我：「一早講咗啦，佢哋係靚女嚟，上堂上到悶望下可以提神，呢啲free good嚟，何樂而不為？」
K：「係喇係喇…出唔出去行下呀？佢哋個個都行開晒…定係，你要走去隔籬個爐同佢哋say個hi，幫手食下啲prime rib？」
我：「唔好難為我，就去行下啦，兜完個圈我都要返去搵返班兄弟。」始終我唔可以學似叉仔係咁黐實啲女。
行下行下，差唔多走到去頭先個位嘅正對面。
我：「妳睇下，佢哋幾個重喺度片緊石仔。」




佢哋亦好快發現咗我哋，K姐同佢嘅姐妹互相揮手。
我：「吖，得返四個人，點解會唔見咗叉仔同埋阿花嘅…呢兩個人實在有啲嫌疑，自從IT科同組之後就成日見佢哋有交流，明明以前都唔識嘅。」
K：「你，係咪又唔抵得？可能佢捉咗阿花去山邊桑林野合呢。」
我：「嘩，有無咁嚴重，返緊學㗎，實在成何體統。」
K：「講笑啫，就算條友有幾瘋狂都無可能喺度做到啲咁嘅嘢，話晒六十幾個同學喺度，非禮下就有機嘅…」
我：「呢條打靶仔，就唔驚堆女神同佢反面嘅咩？」
K：「如果佢識驚，重會唔會喺學校附近同條女大車？」
我：「咪就係奇撚怪，正常嚟講，以嗰班女神嘅底，為乜要接受一個咁唔企理嘅男仔喺身邊？」
K：「好簡單啫，就算佢幾唔企理都好，睇落都對班女仔無惡意，你當佢哋傻嘅咩…」
我：「原來係咁…但就算唔介意，佢嘅存在又有乜益處？無錢送禮物，讀書又幫唔到手，偏偏佢嘅地位重高過學生會啲人或者社長，雖然…啲女神似乎可以唔show任何仔。」




K：「易汪咪show咗你囉，上年食咗妳幾多錢呀？」
我：「嗰啲…小意思啫，只不過係朋友食下飯咁。」