【士㞗彈系列】《她被寄宿到鹽水男孩的家中》2K15中: K863

K：「佢哋幾個，一係逢仔都say no，一係玩返啲仔轉頭，至少對你無興趣，都唔知你咁關心佢哋嚟做乜。」
我：「本身就已經無乜興趣，但突然間出現咗叉仔呢個例外…明明中一到中三初期都無交集，但係而家就…我覺得呢個課題幾值得研究，唔係話坐隔籬位就可以解釋到。」
K：「嘥埋晒啲無謂精神，都唔知為乜…喂！其實我係咪真係咁差？」
我：「吓…妳講啲乜呀…我無話過妳差喎。」
K：「慕容天行，你重喺度扮唔知吖嘛！」
我：「我…要知啲乜呀…妳做乜無端端發脾氣…」
K：「你重係咁吖嘛，我唔想見到你呀，走喇！」
我：「喂，嘉芙連…妳到底…想講乜呀…」其實我覺得唔應該追上去，但因為慣性…可能係班長嘅身份…
K：「你記唔記得中一開學日嗰陣講過，話我係全班第二靚嘅女仔…」
我：「呀，呢個…記得呀，妳唔係嬲呀？重要嬲到而家添？」始終係事實嚟吖，而且係講笑咁講。




K：「我無嬲，我好同意Queenie佢靚過我，無論以前同埋而家都係，雖然我已經無可能重係全班第二靚。」
我：「唉，有乜計喎，鬼叫佢哋幾個都揀晒呢班，但係妳肯定係靚女嚟，有時啲嘢唔係剩睇樣嘅，妳有其他優點。」
K：「你扮夠嘢咪？死心啦，你唔會溝到Queenie㗎喇。」
我：「我認…但就算溝唔到佢，都唔代表我就要溝第二靚嗰個…掛？」雖然眼前嘅女仔應該幾就手。
K：「無人要你溝我，都唔使唔理我掛，我係咪真係咁差？」點算…我實在諗唔到點應對。
我：「妳做乜咁突然…妳應該知道，我唔算係…亦唔打算做嗰啲亂攪男女關係嘅男仔。」
K：「你認為有人想理你係點咩？你覺得自己係君子咋，你識Queenie咩？到底鍾意佢啲乜？咪又係想得到一個靚女咋嘛，靚女就多人溝㗎啦。」
我：「咁…至少我認為佢係一個好獨特嘅女仔。」
K：「獨特又點？咪又係死港女一個！我見到你咁折墮，我覺得自己更加折墮呀！原來…我只配做一個同你亂攪關係嘅女仔…嗚…」
我：「喂…唔好喊啦，其他人睇到點算呢…哎，過嚟喇，呢度有樖大樹可以遮下。」我拉埋佢坐低喺草地，背對住啲人群，先唔想好似叉仔咁周圍俾人講。




K：「你牛高馬大，點匿得埋呀？」
我：「唔係呀，講大嘅話唔夠妳嚟，心口嘅話…」
K：「去死啦你，我喺你眼中唔係乜都唔係嘅咩？」