【士㞗彈系列】《她被寄宿到鹽水男孩的家中》2K15中: K864

我：「從來無講過囉…但係妳做乜突然之間對我咁…」
K：「你以前讚過我靚，人哋開心吖嘛。」
我：「我…都係講笑咁講啫，雖然妳係靚女。」
K：「啲女神唔會理你㗎喇，乜你唔係好想要女嘅咩，其實我都係女仔嚟啫…」
我：「做乜咁話我，而且都無諗過妳係…」
K：「算啦，反正我就係只配同你亂攪關係嘅嗰啲女仔。」佢擰埋一面，個樣嬲爆爆咁。
我：「唔係喇，無咁嘅意思，我只係想講我份人…未至於係周圍撩女嗰啲，唔會同妳亂攪關係啫…」
K：「咁你而家係咪重係非女神就唔要喇？」
我：「唔會啦，佢哋五個一齊更加無可能，只係想同佢哋維持返一個良好啲嘅關係啫。」
K：「因為入面重有三個單身嘅女仔？」




我：「唔係喇…唔溝佢哋呀，唔識溝！」
K：「咁你識唔識溝我呀？」點解可以咁直接…
唉，如果茜旎係咁嘅話你話幾好，不過我知無可能。
我：「我可唔可以答唔識？話晒好似從來無成功過…」
K：「以前嘅嘢唔等於將來㗎嘛，想唔想試下先？」
我：「妳咁突然…而且，如果因為就手就同妳…即係溝妳嘅話攪到我好似，我諗…可唔可以…俾我諗下先。」
K：「要諗…就係因為你覺得我唔夠好，唔鍾意我。」
我：「感情嘅嘢，唔係應該要思考下先會好啲嘅咩？」
K：「講到尾，你係唔捨得同啲女神有一絲嘅機會。」
我：「無機會啦，只係幾年間嘅事，要沉澱一下啫，曾幾何時，真係以為有差唔多追到佢嘅錯覺，但時間過得越耐，其實佢已經唔同咗，我知道自己無可能。」




K：「如果你肯對佢死心，我就同你上床，制唔制？」
我：「吓…都係嗰句，如果放棄佢就即刻同妳…似乎…」
K：「去死啦，咪咁婆媽呀，先唔會迫你同我一齊，但係你肯唔再理佢就可以同我上床，放心我唔會講出去，唔會影響你形象，點呀，制唔制？」
我：「妳講到咁，制囉。」至少…我係好想上床嘅。
K：「但係重有一個條件，你要music day贏埋佢哋我先會送畀你，得唔得先？」
我：「妳做乜…好似好唔鍾意佢哋咁嘅？」
K：「我只係唔抵得佢哋啫，你唔係無信心呀？」
我：「點會呀，贏唔到九成都有七八成啦，妳估兩個月貨仔咁易贏到幾年功夫咩，妳見叉仔都打輸比女班長啦…」
K：「咁就得啦，我當你應承咗我㗎喇。」
我：「保守起見，問埋先，萬一輸咗嘅話我會點？」




K：「輸咗就無㗎喇，同埋，你都唔可以親近返佢哋。」
我：「哦，咁咋，無所謂，妳見我頭先都無理過佢哋。」
K：「重有…無我准許…都唔准追其他女，直到畢業。」
我：「吓…咁樣好無人性喎，即係得返我同妳。」
K：「無喎，唔等如㗎，除非你肯溝我先算啦。」