【士㞗彈系列】《她被寄宿到鹽水男孩的家中》2K15中: K869

由於我哋用學號嚟做號碼，所以一開始多數係啲仔喺度私片，無乜人嗌大號碼嘅女仔，而又因為十一號可能幾順口，一開始我就接咗好多下…重解決咗兩條仔。
F：「十一號！」佢拋到個波好低，可能已經跑到無力。
我：「停！」我由得粒波跌地再捉實。
要知道，呢啲行為係累街坊，因為排球咁大無乜可能掟唔中，於是我彈三步去到露娜身前。
F：「喂！你咁快就唔想同我玩嗱…」
我：「鬼叫妳嗌我號碼呀？！」我隨手一掟…
Y：「我頂你個肺呀！係咪兵變！」YY喺佢後少少…
我：「提妳派兵糧咋！娘娘！」其實就，全世界都知我哋喺度玩緊兵娘遊戲，邊有真軍係咁樣做嘅。
雖然我哋暗啞底同打緊真軍無分別，同佢濕吻堅係正…
而由於我呢個舉動，露娜好快俾啲女神清理咗，係幽蘭直接送走佢，而YY亦都俾K姐踢返出局。玩下玩下，剩返落嚟嘅都係重跑得郁嘅人，包括fit咗同冷靜咗嘅健仔，QQ幽蘭女班長，K姐，男班長同隔籬班一條仔。




由於有個圈箍住，大家都好有信心接到波，三個女神更加喺度玩技術性三傳…實在十分浪費時間。
我：「十三號！」為咗想早啲收工，我將個波掟到好高，等佢哋有返啲要走嘅壓力…交棒畀男班長。
慕：「三十二號！」本來我哋班得三十二人，按道理幽蘭作為第二日嘅插班生會係三十三號，但世事唔係咁…
U：「頂！…停！」原來打排球真係會有甩手嘅問題，個波跌咗落地再彈返上佢隻手。
呢個時候佢喺度搵目標，我喺唔遠又唔近嘅距離，佢就梗係唔會掟自己姐妹啦，而輸贏我又無乜所謂嘅。
U：「你應該都係想畀機會我報仇㗎啦？」佢望實慕生。
慕：「而家妳又未輸住嘅，我都唔係好近啫，萬一妳掟我唔走，就即係掟走妳自己㗎咋。」
U：「無問題吖，咪堂堂正正決一勝負囉。」
慕：「妳鍾意啦，而家玩下啫，咪睇下妳贏唔贏到囉。」佢開始喺度施展軟骨功，務求扭來扭去左閃右避。
U，K：「一！…吖！」點知佢跳起一步之後就將個波高速掟去左手邊嘅K姐度，十足手球咁嘅攻門氣勢，而完全無防避嘅K姐就心口中到應一應，痛到踎咗喺度掩心口。




U：「無嘢嘛…對唔住…」妳都知妳啲無情力會打傷人…
慕：「搞乜呀！要掟咪掟我囉，做乜要偷襲人哋。」
U：「你就係想我掟唔中你吖嘛，我偏唔掟呀。」
慕：「咁都唔係行一步就掟㗎，人哋都未準備好！」
U：「喂！規則係話最多郁三步，無講過係咪一定要用。」啱嘅，同街外人玩就幾黐線都有。
慕：「都唔係咁大力㗎！如果高少少就掟親個頭㗎喇。」
K：「算啦，係我懶得郁…同埋分心得滯。」