【士㞗彈系列】《她被寄宿到鹽水男孩的家中》2K15中: K868

班女神今日不宜打攪，我又可悲地去搵契妹幫手先。
我：「欸…佢哋班友話缺女好悶喎。」
K：「唓，佢哋隔籬嗰圍咪全部女嚟囉，差三米遠咋嘛。」
我：「妳見我都唔行埋去，無謂難為人啦。」
慕：「佢哋帶咗個波嚟，一唔一齊玩？」
我：「嘩，乜咁巴閉呀，係乜嘢波嚟先？」
「欸，小弟帶咗個排球嚟，雖然呢度似乎無適合嘅場地…」世事就係咁，學校旅行實有人帶無謂嘢。
慕：「無人叫你打排球喇，有幾多條友識得打…不如攞嚟玩數字球，似乎都重玩到…但重點，妳哋肯唔肯玩先？」
K：「無問題吖，會就住我哋㗎可？」既然大家姐扤頭，佢嗰幾個妹當然會玩，露娜唔使問梗係黐住我。
自從兜完個圈，見到男班長同K姐黐得埋咗…但喺我角度就好平常咋，純屬自然反應，異性相吸，狗男犬女。




如果唔係班女神，我一早同露娜深入叢林啦…
我：「幾位男士，如果同靚女打數字波，唔知可唔可以緩解到你哋屈悶嘅心情呢？」
龜：「我唔使喇，呢啲唔啱我…」都預咗佢唔會玩。
U：「喂！做乜攞住個排球㗎？家陣大我呀？」又發作…
慕：「唔係，我哋玩下啲低B嘢啫，呢度暫時無妳發揮嘅機會，不如妳再背下鼓譜先…」夠晒火星撞地球。
QQ成日話識音樂就唔使背譜，但喺我眼中彈一首鋼琴要㩒最少幾百粒制實背到傻，想當年要記一分鐘牧童笛指法已經令我痛不欲生，慘絕人寰，四面楚歌…好在有咗團長教路同現代科技，天王星佢既唔使背又唔使睇譜。
U：「背晒喇喎，諗住用個排球打乜呀？」
慕：「唔係打波，玩數字球啫，唔太啱認真嘅妳。」
U：「你唔係話玩都可以好認真咩，定係驚輸咋？我諗我掂住排球嘅時間可能多過你掂住結他嘅。」
慕：「妳明唔明呀？而家係玩數字波，妳係要雙手捉實粒波先再掟嘅，而唔可以一搥打返上天…我諗，有打下籃球同手球嘅我係比較適合呢種活動，起碼我識揸實粒波先。」我夠識啦，揸實一對波添呀。




U：「排球個面咁滑，我驚你跣手咋。」
豬：「哎，講咁多做乜吖，係玩嘅就快啲開波啦。」
V：「咦，係咪兩位班長要預演決戰嘅前哨戰喇。」
「嗱，你哋私片好喇，千祈唔好傷及無辜。」
就係咁，無端端成廿條友喺度玩數字波，採取兩條命出局制，最後留低嗰條友就係贏家，為咗公平起見，我哋喺地下劃發球落球圈，由細龜做裁判…規則好多㗎，例如掟人唔可以掟大髀以下，拋波要高過兩個人咁。