【士㞗彈系列】《她被寄宿到鹽水男孩的家中》2K15中: K877

我：「總而言之，比賽嗰日有good show啦，咁而家畀的士錢我返去先。」我攤大手板問佢攞。
U：「咪走住，喺度睇多陣，等我成功多一次先。」
作為階下囚嘅我係無反抗嘅餘地，點知睇多兩次佢又係斷咗，去到第三次佢直頭開始無耐就甩咗，嬲到要彈game restart；我心諗咁唔係辦法㗎喎，拖下拖下隨時兩點都無得走，我聽日重使返學嘅，最重要係佢並唔係一個我想半夜三更同佢獨處嘅女仔。
我：「明嘅，爭少少啫，過多兩日實無問題。」
U：「乜呀！我頭先真係得㗎！你而家係咪唔信我先？」
我：「點會呢，見妳咁有信心就知唔係講大話啦，不過一剎那嘅成功，並唔等於將來都會成功。」
U：「即係你話我過度自信，唔應該咁早叫你嚟啦？！」
我：「都話無所謂咯，妳咪打得幾好我唔會攪妳㗎喇。」
A：「嘩…你兩隻…三更半夜喺度鬼殺咁嘈攪乜鬼…」
我：「嘩！你先係半夜三更做乜失驚無神喺度出現？！」




A：「啱啱飲完酒…見到呢度重有人咪上嚟八下…」條友都幾無謂㗎喎，按道理就應該係同女飲，但竟然無下場活塞運動？重要得閒偷窺呢度有無人上嚟八掛…
我：「唔通醉得滯…啲女嫌你反應差？」
A：「你理得我吖…天王女而家打成點呀？」
U：「欸…算係進展良好嘅…都叫做打到，完成晒全首歌。」難為妳講得出，啱啱先斷咗好幾次。
A：「咁呀，示範一次嚟睇下…」佢重係滿身酒氣咁。
然後天王星又開始㩒入首歌打鼓，整體嚟講都係咁啦，佢已經熟咗全套動作，少咗好多戳來戳去夾硬嚟嘅姿勢。
U：「嗱！得咗喇，全部notes都打到！」今次算佢好彩。
A：「哦，係呀，原來妳打成咁樣就已經滿足㗎嗱？」
U：「咁…比起幾個禮拜前已經爭好遠。」
A：「我知呀，但無人叫妳迫自己兩個月唔夠就做到普通人起碼大半年先做到嘅嘢㗎喎，等妳咁鍾意單挑band友吖嗱…好在我係指揮唔係夾band嘅啫。」




U：「唔挑都挑咗咯，咁重有乜辦法，我會繼續練㗎…」
A：「雖然係打到晒啲音符，但唔係好中咋喎，一大堆good，一時明顯lagging，追返上之後又跑到ahead晒，其實快慢唔係最大問題，因為除咗妳之外係無任何人睇到個譜，最慘係攪到音樂感好差，無乜coherence，都未計唔同鼓嘅大細聲控制問題，為咗打中而打中，或者妳可以聽返啲錄音就知啲聲唔協調。」夠晒毒舌。
U：「我…唔係唔知…但，你重有無嘢可以幫到我呀？」
A：「唉，早就話咗我既非band友，又唔識打鼓…所以…」
U：「明嘅，算啦，其實你已經幫咗我好多，多謝。」