【士㞗彈系列】《她被寄宿到鹽水男孩的家中》2K15中: K878

A：「但，喺音樂上面嘅哲學，我點都可以同妳分享下嘅。」對住呢條友實在令人火大，因為唔係齋吹。
正如我都可以同其他人講身邊太多女好煩，隨時死得人…
U：「嗯，我洗耳恭聽。」對住團長佢算賣乖㗎喇。
A：「起身先啦，妳一日坐喺度，就每一秒都俾set鼓控制住㗎喇，嗱，過嚟，挨住埲牆，感受下呢度嘅空間，同埋空氣，望下周圍，重有個傻仔喺度。」
U：「嗯，我見到，係我叫佢嚟㗎。」
A：「見到係無用，就好似見到啲音符咁，妳要用妳嘅精神同埋意志，去製造妳心目中嘅嘢出嚟。」
U：「佢今年之內都要聽我話，咁算唔算？」
A：「我唔知佢點解會聽妳話，但妳認為佢甘心咩？」
U：「應該還好？至少佢都接受呢個結果。」
A：「咁妳又有無辦法可以令到我聽妳話？」




U：「有乜可能喎，都唔同層次。」唉，我係廢柴一條囉…
A：「無錯，妳要做啲唔同層次嘅嘢，就必先要提高自己嘅層次，妳要記住妳所產生出嚟嘅音樂係嚟自妳嘅層次，而唔係嚟自個譜畀妳嘅規範，否則，呢個世界上就會有一份最好嘅譜，任何人死練就可以奏出最高級嘅音樂。」
U：「嗯。」呢個死風水佬，令人想揼柒佢。
A：「如果妳當咗份譜係功課，妳最多就只會有一百分，但一百分係代表咗乜？代表妳活喺出題嗰個人嘅規範下面，妳永遠超越唔到佢，萬一有個更強大嘅人負責出題，妳就唔會再攞到一百分，妳就失去自己。」
U：「咁…我到底可以點做…」
A：「聽聞妳識打空手道，又會打波，妳會唔會等到對手埋嚟或者個波到先有反應，而無自己嘅思想？」
U：「梗係唔會啦，咁諗必然輸梗。」
A：「所以，妳所關注嘅唔應該係set鼓，而係妳個身體同啲動作，如果妳覺得呢下想咁樣郁，就唔會俾粒音符迫住妳去追住嚟郁，妳打到晒所有音符唔代表係一首好音樂，只要妳放得低，做返自己，可能甩幾粒結果更加順耳，因為個譜係我寫嘅，而我都唔敢講寫得有幾好。」
U：「你話你唔識打鼓，點解又寫到個譜出嚟？」
A：「妳理得我吖，咁妳諗住要做返自己未先呢？」




U：「我可以呀，但暫時嚟講未有乜方向。」
A：「首先，放開啲先…可以伸開自己嘅手腳，感受下啲手指同腳趾，深呼吸，摸下埲牆，同個空間連接。」