【士㞗彈系列】《她被寄宿到鹽水男孩的家中》2K15中: K890

我：「我乜都唔知，乜都聽唔到…」雖然我乜都知。
Y：「唔關事咯，我係為咗佢嘅實用性啫，至於嗰啲嘢係唔關佢事嘅，重有就係我條仔都未夠十八開乜鬼房。」所以健仔係值得令人羨慕嘅，唔係咁多人有大姐姐照顧。
Q：「講下笑啫，咁認真做乜，不過呢條友都唔係處男嚟，妳唔使驚俾佢知。」又係乜邏輯嚟，驚我報警？
Y：「妳夠唔係處女嚟，都唔知你哋平時係點相處。」
Q：「我好好保護自己，佢好好性幻想我咁相處。」
我：「喂喂喂，第一日識咩，講到我廿四小時喺度幻想緊妳咁。」而家啲中學生男女對話真係呢…
Q：「鬼叫你個腦裝住晒嗰啲嘢，記得分幾粒鐘畀佢。」
Y：「唔使客氣嘞，不過呢…我有樣嘢想睇下妳幫唔幫到手，今年聖誕喺唔喺香港呀？」明知故問。
Q：「嗯，本來就唔喺嘅，但大個咗唔想同屋企人去旅行嚕，同埋…多啲時間溫書吖嘛，放完聖誕就考。」
Y：「咁就啱嘞，個Music Day呢，我哋有音樂，有服裝，但個整體場地重係爭少少，咁學生會某啲人其實就係校園電視同攝影學會啲人嚟，如果拜托下佢哋呢，應該就可以做到live嘅backdrop…」




Q：「得，我係唔會出賣自己嘅肉體嘅。」係真唔係呀。
Y：「無咁誇張喇，只係…聖誕前出一次夜景畀佢哋影下啫，應該十九至廿三是但一日，本來我應承咗話OK㗎喇，但佢哋話播live好多嘢搞，所以要搵多個女仔。」
我：「哦，原來人哋當妳只係搭嗰件煲湯骨。」
Y：「講乜嘢呀，唔好以為佢喺度我就唔敢開你年。」
Q：「影啲乜呀，如果妳接受到，我諗我都得嘅…」
Y：「聖誕女郎，佢哋會準備服裝，但妳唔使太擔心，由於係學校活動唔會話好暴露嘅，攝影會個黃sir都會去。」
Q：「唓，個sir本身就夠晒黃，鹹濕佬嚟。」
Y：「呢啲人所共知就唔使講嘅，鹹唔鹹得過佢先？」
Q：「應該就有啲難度，話晒人哋教咗咁耐書重未俾人炒。」
Y：「妳好似預知佢就嚟俾人炒咁，係咪想出手？」




Q：「無興趣喎，不過我哋作為美少女學生，只要畀少少錯誤嘅暗示出嚟，而佢哋一忍唔住就玩完。」你以為而家啲女中學生好清純？實質都不知可以幾惡毒。
Y：「無怨無仇就無謂攪人啦，咁妳制唔制？其實都係為咗幫Uranus，問佢哋幾個未必肯，如果妳唔去我就turn down人，橫掂未必影響到個輸贏嘅。」
Q：「嗯，其實妳有無考慮過搵返天王星本人，話晒件事係為咗佢自己，可能會拚死去做呢。」
Y：「唔係話無嘅，但呢啲嘢…我都係由容易嘅開始諗。」
我：「萬一女班長話OK，但人哋話唔受，到時都唔知好笑定好喊，又世界大戰都似。」
Y：「喂！得戚喇？喺度挑撥離間？係咪想試下五女神分屍嘅滋味。」