【士㞗彈系列】《她被寄宿到鹽水男孩的家中》2K15中: K910

一路返工一路諗，一齊住，然後搵錢，養女人，互相照顧，再屌佢個閪…繼續一路循環，係咪就係夫妻嘅本質？我同佢會一直咁落去？假如變成咁我哋呢啲重係咪愛情？同細蚊之前已經唔係㗎啦…呀！點解Angel唔再做啤酒妹㗎，我重好想同佢一齊返工放工呀。
的確學易汪話齋，只要夠真心一秒就已經係愛。
我亦好清楚除咗QQ之外，好多女仔都可以帶畀我愛嘅感覺…唔單止想做，係有種難以名狀愛嘅刺激。
我：「嘩！細蚊做乜喺度嘅？等我放工？」佢就喺酒樓對開平台我歸家必經之路啲欄桿度挨住。
蚊：「算係啦，我大概都知你幾點放工。」
我：「傻嘅咩，天氣又凍，要搵我直接打畀我咪得。」
蚊：「唔關事喇，我都係啱啱收工，頭先做到成十一點先包晒咋陰功，咁咪順便過嚟見下你囉。」
我：「原來做到咁夜…辛唔辛苦呀？」
蚊：「辛苦呀，最辛苦係冚蓋同埋黐膠紙，包到手指痛咁滯，好在做兩日咋，今日我中午未夠就去到，做咗成十二粒鐘先包得晒咋，嗱，好彩即刻有糧出。」第一次出糧嘅佢，攞住兩張五百蚊紙，個樣非常開心。
正如健仔所講，呢啲豬頭骨好難搵人做，成廿粒鐘無停手先得一千蚊，我不如走去企KFC？當然，我知道呢個世界上有好多包裝女工神人，佢哋速度隨時係細蚊兩倍。




我：「咁都好吖，如果個死仔再有筍位，我先問下妳有無興趣啦，女仔唔可以做傷隻手㗎…不過，話時話妳剩係想見下我？其實隨時都得唔使夜鼆鼆先嚟，妳屋企人…會唔會擔心妳㗎？」
蚊：「以前嚟搵你咪又係攪到十點幾十一點先返屋企，佢哋慣㗎喇，我有同佢哋講係去同學間公司幫手做嘢，所以是但啦…同埋，呢度有嘢益你！」
我：「做乜有曲奇嘅，妳唔係打斧頭穿櫃桶底呀？」我成日覺得嗰啲所謂禮盒唔會有人數，少幾塊邊有人知。
蚊：「我點會喎！我嘅責任係包括揀返嗰啲碎咗嘅出嚟，重有嗰啲封口乜嚟乜斜嗰啲，個經理出完糧之後就攞個紙袋畀我話執一袋走。」點解…我腦海浮現嘅係韻婷。
我：「妳留返自己啦，畢竟都係妳努力得返嚟嘅。」
蚊：「人哋想同你一齊食吖嘛，咁樣好味啲㗎。」
我：「咁…而家食幾塊得喇，剩返嗰啲妳攞返屋企，細佬見到應該會好開心，平時邊有咁多零食。」一來屋企窮啦，二來大人唔識買，而我重思考緊今年繼唔繼續掃黑罐好，斷卡路里計嘅話其實係非常之超值。
但今年個勢幽蘭實會有剩餘物資轉交QQ都似。