【士㞗彈系列】《她被寄宿到鹽水男孩的家中》2K15中: K915

鄧：「口水都乾，好自為之啦，幫我叫下一位入嚟。」
唓，係妳要同我吹女，講多兩粒鐘都重得呀。
我叫咗下位路人入去，而易同學個樣就幾時都唔妥我咁，話時話路人係咪都讀書渣嘅呢？呢幾件分分鐘水過我。
F：「謦咁耐嘅，唔通真係要準備留級？」
我：「邊有咁嚴重，佢只係勸戒我專心學習，不近女色。」
U：「吹啦你，快啲上去吧啦，兩條女等緊你。」
唉，走人先，完全諗唔通契妹同天王星諗緊乜交叉…
入到禮堂，好多人做緊嘢，我比較睇得明嘅係拉咪線。
Z：「啱喇，你嚟到就幫手排凳啦，聽日係細場嚟嘅，整兩個十乘十，中間係走廊就得，唔該。」
如果大家重讀緊書，應該就知道禮堂平時啲凳通常係十張疊埋一棟放喺後方，重有隻專用嘅推凳鏟車。點都好啦，話晒做開酒樓鋪下凳又無乜嘢嘅，係比較嘥時間，當一張凳要開十五秒，二百張就需要用五十分鐘。吓！乜嘢話？你話你唔識計？咁真係要返多啲學，因為實踐係唯一證實真理嘅方式，你唔試下性騷擾女同學點知巴掌有幾痛。




「喂！叉仔，條走廊拉開啲好喎，咁窄點放嘢呀？」有個女仔同我講嘢，而佢後面係另一個女仔，佢就攞住部cam，而佢嘅跟班就攞住個腳架。
我：「咁…好啦，但…妳識我嘅？」
「點敢唔識呀，我校聞名遐邇嘅中四渣男交叉仔阿爽。」唔知點解，雖然我唔係渣男，但聽到都幾爽。
我：「我又何德何能呀，妳哋係？」雖然點睇呢兩條女同我大纜都扯唔埋，但禮貌上係要八掛下嘅。
意：「你條友唔係同德爺好熟嘅咩？我哋係佢嘅徒妹，校園電視同出版組嘅人，我係阿意，佢係阿娥。」
我：「哦…咁阿意師姐，我去執凳先啦。」感覺上佢哋呢堆人都係怪怪地嘅，我唔識咁應該係中五嚟？
嗯…問題係點樣將成堆凳推過少少呢？話晒我已經鋪咗七行有多…呀！將中間一張搬去出面咪得囉，我真聰明。
如是者，我繼續搬凳，兩個姐姐就喺度較炮；雖然唔係話乜嘢靚女但都要昅下嘅，意姐姐係高身嘅超平胸港女，長頭髮，娥姐姐就係中身嘅叫有波眼鏡娘，中髮尾端小波浪；兩個感覺上都唔好惹，估計以前德爺實怕咗佢哋。
幾經辛苦排好二百張凳，台上面嘅QQ就叫咗我上去。
Q：「嗱，而家台上面有八枝咪，已經插晒落mixer度，喇叭係無開嘅，你去幫我哋試下正唔正常。」