【士㞗彈系列】《她被寄宿到鹽水男孩的家中》2K15中: K914

鄧：「又未算係嘅…不過我同佢發展得幾好，講返你先，其實又未至於考得好差，因為本來就唔係特別好。」
我：「既然係咁，妳做乜叫我過嚟照肺呀？」
鄧：「咁你想唔想知自己考第幾吖？」
我：「想，除非考第尾，咁就唔好同我講。」
鄧：「咪自欺欺人啦，你今次係考第三十嘅…喂，唔使數手指喇，即係尾四呀。」
我：「咁即係跌出三甲，我係咪應該要慶祝先啱？」
鄧：「乜跌出呀，今次先係第一次高中嘅成績嚟，你全部科大致上合格，數學同M1都計得唔錯，但你啲中英文似乎又差返咗啲喎，如果你keep得住暑假前嘅進步，理論上名次係可以再好少少嘅。」
我：「救命，妳都知我本來智商堪憂嘅，可以keep得住個v已經好好㗎喇，妳重期望我keep住個a添？」
鄧：「唔知你講乜，總之你諗你啦，牛高馬大做物流或者建築都餓唔死，但我主要唔係想講你，而係你身邊啲女仔，茜旎同埋女班長都退步唔少，重有阿健都有少少，唔知同你有無關係嘞，希望你唔好帶壞佢哋啦。」
我：「幽蘭都喺我隔籬啫，咪又係考第二。」




鄧：「我唔知佢以前成績係點，無從判斷佢差咗定好咗，但呢個基本上就唔使我亦輪唔到我去關心。」
我：「哦，健仔…青春期嘛，茜旎都要搵下食㗎，妳懂的，至於女班長妳直接問佢算啦，我諗就同我無乜關係，而我…就希望以後一路合格落去啦。」
鄧：「其實呢，你身邊啲女仔就好多都好叻嘅，如果你多啲向佢哋請教，互相鼓勵嘅話，相信你嘅成績係重有進步空間，假設你嘅目標只係高配合格，咁五科三即係十五分，到揀大學嗰陣你會好頭痛。」
我：「即係十五分就有大學收？幾好，讀乜無所謂啦…」
鄧：「咁，女朋友係茜旎定露娜又有無所謂呀？」
俾佢咁樣一講，我當堂啞口無言，不過佢無繼續講落去，分明係想睇我點樣絕地反擊死魚彈攞返揸沙。
我：「睇嚟，妳已經知道得太多…」
鄧：「你識跟蹤先生去街，我都識八掛你返學搞緊乜嘅，嗱，茜旎我就唔係太擔心嘅，但你唔好同其他女同學攪到一鑊粥，我只係想專心教書。」
我：「到底我做錯乜？話晒我而家連拖都無拍。」
鄧：「呢間學校比較開明，就算你正常拍拖都唔會煩到我，係驚你攪咗啲驚天地泣鬼神嘅事宜出嚟。」




我：「無啦…我而家全副心力放喺同茜旎一齊生活上面，而佢又有男朋友嘅，其他嘢我慳返唔諗喇。」講係咁講，但如果佢知道咗我同其他女啲越軌行為實斬開我幾轆都似，唔好話佢，我自己都有啲頭痛。