【士㞗彈系列】《她被寄宿到鹽水男孩的家中》2K15中: K941

健：「呢個…妳唔好同其他人講喎，始終佢大我幾年，呢啲事情對佢嚟講好平常，有啲嘢只不過係順水推舟，妳都明嘅，我就唔講太詳細。」
我：「係呀，你直頭係委曲求全，以一己微力成就大姐姐嘅私慾，係大愛，係奉獻，你自己唔想扑嘢嘅？」
健：「喂呀，有女仔喺度就唔好講得咁粗鄙啦。」
F：「咁第一次，興唔興奮？刺唔刺激？舒唔舒服？」
健：「嗯，體驗良好嘅，一定好過佢先。」
我：「人哋係問你呀，燒埋去我度做乜？」
健：「咁建基於清楚意識之下，雙方自願，我相信自然比較容易得出一個良好嘅結果。」越嚟越想揼柒佢。
F：「都係嘅，有姐姐lead住應該會好順利同開心。」
我：「做嗰陣咪係囉，之後先發覺俾人呃蝦條慘慘豬。」
F：「吓，呢條友去呃人蝦條？」




我：「唔係，係佢俾姐姐隻蝦呃咗蝦條。」
健：「夠喇，無乜好討論，我同佢而家咪幾好。」
我：「你鍾意囉，到唔開心嗰陣唔好煩住晒就得。」
F：「咁都幾好嘅，見你而家個樣開心過以前。」
健：「係呢…其實妳係咪對佢有意思？」
F：「黐線！無可能囉！我又唔係女神嚟，只不過見佢傻更更幾得意咁先同佢玩下咋嘛。」都好嘅，幾驚佢直認然後話我請佢食檸檬。
我：「但妳成日出現喺我身邊會唔會唔係幾好，我隔籬每一個女仔都會俾人講壞話，啲女神就話目空一切啫。」
F：「是但啦，無其他仔搵我，對我影響不大。」
健：「妳都幾靚女吖，點會無人追呀？」日日有大姐姐陪嘅健仔，當然開始識得同女仔講好說話。
F：「又唔係完全無，只不過係我無興趣嘅男仔。」




健：「會唔會係妳要求高得滯？」例如我呢啲廢柴？
F：「邊係吖，佢哋有啲都幾恐怖，一定無你兩個咁正常先。」我成日覺得啲女將唔識溝女同恐怖畫上咗等號。
我：「多謝抬舉，話時話，妳做乜唔去搵妳班姐妹？」唔係我想趕走佢，係驚佢哋內訌不和多啲。
F：「嗯，咁頭先唔係一齊落堂吖嘛，同埋我估佢哋可能搵緊食，或者可以去籃球場撞下佢哋。」
健：「搵食？籃球場有乜食呀，波餅？」
我：「唔知你係想搞笑定扮唔識，跟埋去睇下咪知囉。」
去到籃球場，一眼就見到身型高大嘅Myth喺度射緊波，隔籬重有Oliver同Gregory喺度，同另外三個其他班嘅喺度半場3v3；咁話晒人哋唔同我，係喺求偶期入面，當然要好好表現自己。
場邊鶴其中就有K姐，阿Cat，生得比較矮一睇就知唔啱打籃球嘅易同學，兩條女身邊重有一個打開波嘅。