【士㞗彈系列】《她被寄宿到鹽水男孩的家中》2K15中: K945

V：「傻瓜，我準備咗晚餐，陪我落去攞嘢吖。」幽蘭走過嚟㧻下我，佢啲動作同埋神情實在係好少女心。
佢行到去二樓就停咗喺度，由個窗望返落去馬路。
我：「嗯？原來你管家重未到㗎。」
V：「嚟緊，樓下唔泊得車吖嘛，所以咪預備定先。」
我：「乜唔係…俾人抄牌都係罰幾嚿水咋咩？」成日聽人講香港搵位泊車艱難又貴，畀幾嚿水當兩粒鐘泊車錢算。
V：「照你咁講，我call隊車嚟封晒條路都得㗎啦，一萬幾千就可以塞死條路，停車場啲車又出唔到嚟。」
我：「咁又唔係…妳係咪有啲唔開心呀？」
V：「擔心緊星期五嘅表現啫，好驚有啲乜嘢差錯。」
我：「妳哋已經用咗最大努力去準備，無愧於心咪得…」
V：「我都唔知，其實唔關我事，但係關乎咁多人嘅成敗，我實在係好唔想輸。」




我：「呢個世界唔係贏就係輸，妳估Myth佢哋唔驚輸咩，我就覺得，平常心面對到時先至有最好嘅表現。」
V：「如果表現到最好都重係輸，咁就係真正嘅失敗。」
我：「重有幾日時間準備，而家唔好諗埋呢啲嘢啦。」
V：「就好似…我永遠唔夠茜旎可愛，又無班長嘅自信。」
我：「做乜要同自己啲姐妹比較呢，大家各有各特色嘅啫，妳讀書成績又好，又有貴氣…」我想讚佢音樂造詣超班，但又未必幫到佢哋幾個贏，屋企有錢又好似唔係優點嚟，至於靚就…更加唔係自己控制。
V：「成績好有用咩？又唔係同佢哋幾個一齊努力返嚟，只不過係交功課畀屋企啫，只要請得起最好嘅老師，肯花時間就個個都可以有好成績啦，而且…我咁樣突然插入嚟攞個第二…我知道雅如佢以前年年考第二㗎，好驚佢哋嗰班會唔鍾意我。」我唔太同意肯溫就乜都識晒…
我：「傻瓜，呢個世界唔會有人係得到所有人歡心㗎，正如我呢啲，男班長應該不知幾想殺咗我，又好多先生都睇我唔順眼咁，咪又係咁過活。」
V：「其實團長真係好叻，佢講得無錯，我只不過係一個有錢女，撇除呢點之外我一啲都唔特別，我相信佢真心對我無興趣，反而打茜旎屁股就好開心。」
我：「哎吔，佢呢啲人講嘢…又有乜好認真呢，咪剩係識玩女，最緊要嘅係，Queenie一定係最重視妳㗎，加埋佢班姐妹，同埋我，都會好好珍惜同妳嘅友誼，至於嗰啲死讀書嘅想點諗咪由得佢，妳又無整到佢低分咗。」
V：「以前茜旎屋企有錢，我覺得佢同我真係好相似。」係鬼，嗰個死港女首先會串過妳先，又無貞操…




我：「我對佢有信心，無論變成點佢一樣對妳咁好。」
V：「咁你呢？會唔會好似想抱茜旎咁抱我？」
我：「但係…我同你嘅關係如果經常攬攬惜惜似乎唔係幾好。」雖然呢種唔係幾好已經蔓延咗四個女神。