【士㞗彈系列】《她被寄宿到鹽水男孩的家中》2K15中: K953

我：「唔係可以點？好有情調咁氹妳上床，然後完事就整喊妳，之後到我呢邊爆大鑊，我覺得無呢個必要囉。」
F：「妖，食屎啦，人哋想八掛下你同班女神放完飯返嚟做乜個樣唔同晒咋嘛。」女人剩係識關心埋啲咁嘅嘢。
我：「做乜呀，我哋個樣好明顯咩？」
F：「明顯呀，睇你哋三張凳個間距就知啦，如果係一般同學關係呢，三張凳嘅空間係應該平均分配嘅，如果以女男女嚟排列呢，根據異性相斥同埋事避嫌疑法則，中間嘅男仔係會霸多咗空間嘅，就好似坐你後面嗰三位咁，男女班長中間條罅係一直大過Zilvia嗰邊好多，相反你同兩位女仔條罅就窄到乜咁，成副一王兩后咁嘅氣派，但由於你係坐正中間嘅所以主動權唔喺你度，換言之即係佢兩個迫埋嚟，更過份嘅係，有時幽蘭同Queenie為咗謦欬會挨晒落你度，甚至用手撐住你大髀，不過呢，頭先你哋三張凳就比起平時鬆散咗好多，giant structure瓦解咁款。」
呢位女仔呢，實在夠晒觀察入微同勇於表達。
我：「詳細唔講喇，應該係做咗啲衰嘢激嬲佢哋。」
F：「無嘢嘅，最多咪嬲你兩三日，淡定。」
我：「妳又知？就算妳係女仔，都唔係個個一樣。」
F：「連女班長你都氹得掂，重有乜係解決唔到吖。」
我：「我都唔知，因為今次嘅起因又係佢…」




F：「咁…唔通要絕交？使唔使我上嚟你屋企安慰下你？」
我：「唔…唔使勞煩妳，我屋企七國咁亂，唔敢招呼任何女仔。」無錯，窗台、梳化、QQ張床同佢個喼隨時都見到佢啲內衣褲，叫我點招呼女仔上嚟，除咗細蚊。
F：「你唔使咁驚喎，我唔係嚟乘虛而入嘅，勉強無幸福，到你用得著我嗰陣就自然會搵我㗎啦，係咪先？」
我：「邏輯上嚟講係嘅，例如發現全世界得返妳一個女仔就即刻嚟搵妳…直情要鎖喺屋企驚俾人搶走嗰隻。」
F：「要得返我一個…即係少緊五個女神都重未夠。」
我：「講笑啫，我諗少緊一個已經會即刻抱住妳…但…都係因為想要女啫，妳明嘅，不過感情可以培養下…如果呢，我身邊一個女仔都無，又或者身邊啲女仔唔係女神，妳重會唔會對我有意思？」
F：「你都搵嚟講嘅，如果係咁你就唔會起眼，我就留意唔到你，唔會有呢個諗法，你又唔係啲乜嘢好仔。」
我：「咁咪係囉，妳又黐埋嚟，唔想妳有一日嬲咗我。」
F：「本身就嬲爆你，咁直接請我食檸檬，一啲struggle都無，又唔係已經同佢哋拍緊拖…」
我：「如果妳嬲我，唔係應該要唔理我嘅咩？」