【士㞗彈系列】《她被寄宿到鹽水男孩的家中》2K15中: K970

諗同女仔食乜係男仔嘅千古難題嚟，而且眼前幾個都係女神，加上有健康飲食嘅顧慮…望下個App先，排頭位嘅普遍係買咗置頂費嘅連鎖店，首選M記，KFC嘅垃圾食物，跟住就係熱氣pizza，味精譚仔，再嚟就係hea爆大家快活樂也融融，冚唪爛都係不可以用嚟招呼女神…元氣美心壽司？算吧啦，多次聽過啲女神投訴連吉吉島超市嘅都不如；嗌茶記只會俾佢哋鬧唔用腦兼夾自私，加之油膩是必然，煎炸少不免，燒臘太麻甩，然而對身體最低傷害嘅粟米肉粒飯絕對係會俾佢哋唾棄，單單太多澱粉已經係死罪難逃；無病又唔可以食粥，港女cafe嘅沙律小弟亦嗌唔落手，因為我知道得幾條草其實喂唔飽大食班長。
妖，明明唔使我出錢就有得食，點解可以咁痛苦。
都係幽蘭好，一聲叫管家準備就萬全妥當連運輸…
嗯…算啦，就呢間，進可攻退可守唔死得人，起碼我自己鍾意食先…再者價錢符合一般常識。
點完餐，連銀碼都懶得睇就㩒確定，一班大小姐繼續專住喺佢哋嘅事情上面；難得揸住女班長部電話，百厭嘅我自然就會多手左㩒右㩒，其實都係睇下相啫，大部份係學校影嘅，例如塊壁報板，社員開會，同QQ佢哋行街，空手道考帶…就轆到底之際，我竟然見到一張藍色嘅泳衣相，上下分離再拉個尖端互扣嗰啲，條fit到漏油嘅腰露晒出嚟；但通通都唔係重點，因為隔籬有幅無頭嘅全裸照…
應該係對上個暑假影？睇嚟啲女實在好鍾意記錄低自己嘅青春，每日影下下面塊草地啲蠶豆點發芽生長越發茂密…
即係咁，佢曾經都話俾我睇佢嘅身體…所以唔係好衰啫。
最後我無放大張相嚟睇，因為我怕忍唔住偷偷mail埋幅相畀自己，其實有啲嘢知咪算囉，攪都攪易汪先啦。
等咗半個鐘左右，兩大袋食物送到上嚟。
佢哋嘅食物係蝦餃，豆苗餃，燒賣皇，流沙包，小籠包，燉蛋，蟲草花螺片燉雞，姬松茸雪耳燉雞…我重好乖咁影咗幅相畀幽蘭睇，應該會滿意掛。




U：「喂，點解你個死仔同我哋食嘅嘢唔同㗎？」
我：「邊有唔同，明明就係同一間鋪頭嘅出品嚟。」無他，臘腸滑雞飯，鮮蝦腐皮卷，黑椒金錢肚，少少地一百蚊有個銀仔找咁…
Y：「係問你點解個風味相差咁遠。」
我：「有乜計，幽蘭唔准妳哋食呢啲，如果唔係佢早就食緊椒鹽瀨尿蝦啦。」我到而家重係諗唔明嗰啲油炸異形點好味得過佢口中嗰粒蝦餃，單單要拆殼我已經唔想食。
Y：「家陣我係娘娘定幽蘭係娘娘呀！」人哋係仙女囉…