【士㞗彈系列】《她被寄宿到鹽水男孩的家中》2K15中: K971

於是乎，我嘅臘腸，金錢肚，炸蝦卷瞬間唔見咗一半，換嚟兩個半邊無乜流沙但附有口水尾嘅白包。
不突止，半邊小籠包皮都有兩塊，她們真的很愛我。
唯獨Zilvia繼續乖乖地安靜咁食菜苗餃。
Y：「Zilvia，啲文件嘢係咪搞掂晒喇？」
Z：「嗯，我睇住印好晒先過嚟㗎，啲effect都係咁意試過，按道理聽日一切正常。」
Y：「最擔心都係呢條友，到而家重攞住我哋部無線咪mixer嚟研究…」
我：「大佬，我不停咁望住就係為咗聽日唔好出錯囉唔該。」一共六入十二出加aux in同兩個main out，單單係扭扭已經十八加三粒，而selector係有三十六粒…佢哋個咪上面係有顏色分，我要記住邊行係邊條女…
Y：「嗱，我哋聽日入正題之前係會有堆無謂嘢講嘅，到時你可以試個output，記住望實我哋個口形同表情，因為feedback係會全出，未必聽到aux無聲。」
講緊無實地綵排過，而我係喺後台側邊囉唔該…
高低音唔使處理，聲道已經預先㩒好，so far理論上我只係要負責聽到五條人聲同六條樂器，加埋較大細聲…




食完飯佢哋又開始練，不過係我愛蕭邦而唔係夾band。
我：「妳哋樂器組唔係胸有成竹喇咩？唔練返band嘅？」
Q：「少咗幽蘭嘛，費事攪亂個form啦，同埋不停練同一樣嘢嘅話係會慢慢失去個感覺㗎，band呢啲好講即興，既然佢個鼓譜已經無問題，到時鬥嘅就係靈魂而唔係音樂。」QQ一副馬嘴咁嘅樣嚟答我呢個牛頭，認真彈琴。
我：「換言之，樂器組演出即係唔需要靈魂？」
Z：「都係嘅，對住份譜吹啱晒就得，又唔多使理其他人…」當真…咁團長呢啲指揮有乜用？唔好蝦我讀書少…
我諗應該係佢哋三個已經夾到第四年，一早慣晒啫。
Y：「聽日嘅演出，最緊要係一開始睇住班長入beat呀。」天王星呢個音樂白癡，面前個mon就係佢個絕對世界，係無得更改調整，其他人又無得儽埋晒去睇，所以入歌之前個小節係加咗四下假notes俾佢敲空氣棍嚟做指揮。
好神奇，連我自己都一頭煙兼越嚟越大壓力，開始唔記得咗前面呢幾個係甲級美女，同埋下身一褲都係。
學陳蕾士話齋，呀唔係，黃國彬先啱；音樂嘅嘢，你明就一點就明，你唔明呢，就只不過係啲爛作者呃緊字數。
U：「好！今日到此為止！聽日good show！」




你以為佢哋會疊手手？Sor，優雅嘅女仔係唔會做呢啲無謂嘢，你有無見過管弦樂團開show前會學美式足球隊咁咆哮？除非佢哋幾個都係暴力女啦。
今日我要攞埋兩箱監聽咪同部mixer返屋企，亦應該係我哋最後一次咁齊人由新蒲崗行去鑽石山，係少咗幽蘭啫，雖然佢本身就唔會同我哋一齊行，有時總覺得佢會失落…
我：「欬…我有啲嘢想同Queenie講，妳哋幾個行先啦。」
Y：「咁妳兩個行先啦。」我同QQ都O咗嘴，大O嚟嘅。