【士㞗彈系列】《她被寄宿到鹽水男孩的家中》2K15中: K976

等到中六入埋嚟之後就先生進場，全人類坐低，校長上台講一分鐘嘅廢話叫我哋玩得開心啲，然後音樂Miss介紹嘉賓同評判，不外乎校監校董家教會主席，音樂Miss當然係評判，再抽高低form語文非語文四位先生，學生會會長，重有個唔知邊度搵返嚟我識條毛嘅YouTube唱作歌手，加本身學校合作開嘅校外樂器導師。
廢話講完，先由嗰位唱作歌手揸住部木結他高歌一曲幫大家熱身，最重要因為佢係仔嚟，所以我得鬼閒理佢開始喺度揭學生會啱啱派嗰本書仔，無非都係等你知道啲曲目次序同埋歌詞，打頭陣嘅就係樂器演出…跟住solo，對唱，放飯，下晝就係令人興奮嘅大組同小組，最後係玩票性質居多嘅熱舞，頒埋奬就放學。
本身對音樂日無興趣，所以我唯一關心嘅就係兩位班長嘅對決安排，原來小組歌唱都有成八組參加喎，中六F4唱Beyond光輝歲月…夠晒不倫不類唔激死家駒唔安樂咁款，Mythology唱Bon Jovi嘅妳敗壞了愛的名聲，重有一幅當年樂隊嘅附圖，不過人哋係有五個人喎…
至於女神們…QuzVy嘅月光花，附有日文同中譯歌詞，排版相對簡單似係教科書格式，應該係Zilvia琴日留低整…
健：「唔使咁擔心呀？佢哋女神無雙咁無理由會輸嘅。」
我：「點知喎，對面始終夾咗咁多年，唔應該輕敵。」
慕：「多謝你嘅認同，我哋陣間會全力以赴。」嘩，撞鬼原來佢係坐喺我嘅右後方，左邊重要係K姐，跟住阿cat同契妹…
龜：「垃圾，唱嘅又係韓團，跳嘅又係韓團，而家啲學生真係好無品味。」佢望住本書仔講。
我：「潮流係咁…唔係喎，女神唱嗰首係日團嚟㗎，叫乜嘢聖女貞德樂團。」
龜：「唔知乜嚟，對唔住。」老實講，我覺得呢隻爬行動物除咗數字團啲乜乜坂就一概唔曉，睇嚟我要介紹道玄坂69畀佢睇下，點都正過乃木坂先。




個二打六唱完首三唔識七嘅歌之後，就有位中一嘅小妹妹上去表演洋琴，雖然唔知係乜嚟但聽落佢又幾犀利喎，攞住兩枝筷子咁嘅東東敲到鋼琴嘅感覺出嚟，但何解好地地中樂器要用洋琴呢個名呢，唔叫漢琴華琴？
Q：「我哋要準備㗎喇，你出一出嚟先。」前面隻Q講。
我：「得唔得㗎，隨便離開位驚俾訓導鬧喎。」
Q：「你個樣係做緊嘢而唔係偷走，鬼得閒有人鬧你。」
於是，佢哋推咗其中一個喼出禮堂門外走廊。
Y：「嗱，我哋而家去換衫先，陣間會由側梯上返嚟穿去後台，你而家就同我入返去禮堂直入後台，set鼓已經放咗喺度，你幫我tune返同band房嗰set一樣位就得，留喺原位唔使郁，陣間佢會喺後台打，你就留喺度直到我哋上台幫我哋調音。」