【士㞗彈系列】《她被寄宿到鹽水男孩的家中》2K15中: K975

慕：「陣間畀心機，睇妳表演喇。」
U：「使你講。」佢揸住對鼓棍敲落去本最厚嘅物理書。
對棍唔係佢買嘅，band房有十幾廿對喺度佢揀咗對最啱心水嘅借返嚟，粒蒂…即係個lin頭係近乎圓形，雖然我唔知對音色或技術有啲乜影響，可能同凸點condom嘅原理差唔多。
V：「呢袋嘢都畀埋你keep住先，唔好跌落地呀。」
我：「哦，係iPad，但係點解有兩部咁多嘅？」
V：「如果有部突然壞咗點算，又或者無電呢？」
我：「大小姐實在係有備而戰，未雨綢繆，一石二鳥呀下…」莫講話兩部，兩打佢都準備到啦，但講返轉頭如果iPad會壞，妳哋啲結他同bass又會唔會壞？
明嘅，知妳哋最擔心班長，因為無咗個畫面就變成又聾又盲又啞，而妳哋小咗條線或者都彈到係咪？
呢啲日子，班主任上嚟做樣講兩句就消失，夠晒吞泡。
話雖全班同學已經習慣咗幽蘭，但佢抱住個電結他盒仍然係會招嚟大量目光；而我枱上面一大堆雜物亦好顯眼，個個望過嚟包括我個好契妹，另外就係K姐喺度同男班長眉來眼去…都好嘅，Myth有著落就唔會煩到班女神，橫掂佢就算食晒班上面啲姣閪我都唔會係受害者。




突然間！我膊頭傳嚟咗一陣痛擊。
我：「欸…班長，風紀，妳應該唔會鼓勵學生襲擊前面位嘅同學㗎可？」佢用鼓棍喺度敲我。
U：「平時就係嘅，今日可以放鬆啲，你以前都應該騷擾唔少前面位啦，我喺度試緊你呢啲硬骨頭彈唔彈。」
慕：「似乎有紋有路喎，起碼唔係用緊死力。」
U：「當然啦，就算打空手道都唔係用死力㗎喎。」
我：「用死力嘅場合，應該係得修理print…呀！」
U：「再講吖嗱！信唔信我當你係部printer。」
慕：「冷靜啲，佢呢啲硬骨頭分分鐘打斷妳對棍，陣間上唔到場我勝之不武就唔係幾好意思啦。」
我：「怕乜，佢呢啲搵校工借雞毛掃…嘩！」
V：「咪玩呀！如果撞跌咗啲樂器你幾條命都唔夠用。」




係嘅，知錯，幽蘭好似對呢啲學校活動係特別認真嘅。
浪費咗十幾分鐘光陰之後，終於聽到學校嗌大咪中一去禮堂，因為啲矮冬瓜要坐頭位…其實我覺得呢種編排極之唔公平，佢哋初嚟報到先幾個月人都唔識多個點會有感覺吖，相反啲最珍惜校園生活嘅中五六生就要坐最後排。
生得高係唔會俾人遮住，但唔代表我哋對眼係望遠鏡…
話咁快嗌到中四，女班長一聲令下健仔肥豬細龜就幫手搬嘢，另外重有思韻，而我自己剩係搬QQ部琴同架已經full load。
去到禮堂join返佢哋幾個，搬晒啲樂器去後台，兩個喼就留喺走廊位…好唔慣呢啲日子要打仗咁。