【士㞗彈系列】《她被寄宿到鹽水男孩的家中》2K15中: K979

U：「但係呢度真係比較暗…雖然啱位嘅話就應該睇唔到都可以打中。」對住物理鼓，佢只可以輕輕咁貼枝棍上去。
V：「重有我吖嘛，等我幫妳打燈啦，又可以方便佢哋幾個睇住妳嚟入beat。」台中間係可以偷窺呢度個位。
喺後台嘅同學逐個逐個出去演奏，好似睇醫生咁。
Solo完咗就到小組，佢哋三個係第一組表演，當佢哋行出去嘅時候我就示意本來喺度較大細聲個哥仔交部mixer畀我，佢嘅作用係較大細聲㗎咋，僅此而已。
台上面本來就有五枝咪喺度，QQ行到最遠set枝一號咪落部三角琴度，易汪企中間喺三號咪前面，Zilvia四號…最後後台set鼓拉咗落尾位。
我戴住耳機，望住佢哋幾個嘅動作，由QQ開始各試咗幾粒音，我就好似平時咁確保聽到佢哋嘅聲，打咗個OK嘅手勢，之後由幽蘭serve天王星開始。
短片一開始播到四粒假音，幽蘭就幫手做埋指揮，當枝鼓棍敲落個鼓嘅同時易汪就開始拖佢枝弓，而之後嘅就已經無乜特別同播帶一樣，我只係較大聲咗部鋼琴少少。
一如既往，係悅耳嘅純音樂，四分零鐘之後台下就傳來陣陣掌聲，對佢哋幾個嚟講可以話早就慣晒。
U：「終於完…好彩全部打啱晒。」
V：「應該嘅，我就住妳寫出嚟㗎嘛。」




任務完成，我交返部耳機畀個哥仔走人。
Y：「咪幾好，就知妳實無問題，熱完身陣間就有感覺。」
U：「好緊張呀，咁妳哋唔係熱身吖嘛。」
Q：「吓，我哋都係當熱身㗎咋喎，反正年年都要上嚟交差彈首歌，都係咁啫，贏輸無乜所謂，邊同妳啲決鬥…」
Z：「係呀，以前我都會好緊張，後來當上台係音樂考試之後就無咗回事，而我喺台上面就只會望住佢兩個。」
V：「可以無壓力咁玩音樂真係好，唔會後台幾廿對眼咁釘住妳哋…」
Y：「晏晝就唔得喇，會有四對眼想釘死我哋，女班長嘅命運就靠晒妳哋，唔想佢要道歉嘅話。」
Z：「其實輸咗講兩句道歉…好似都無乜嘢啫。」
Q：「點得，呢個係面子嘅問題，而唔關有乜後果事。」
Y：「都好大鑊㗎，今時今日道歉要講究有無禮貌。」




V：「吓…道歉重可以點分有無禮貌？」
Y：「哈，彎腰露出乳溝咪叫有禮貌囉。」
Q：「咪黐線啦，又唔係一早講明，無禮貌佢吹得妳脹咩…」
Y：「其實應該由妳去代罪啦，男班長肯定覺得妳最有禮貌！」咁啱嘅，五個女神之中數QQ最大波。
U：「無呀！我哋點會輸，無可能要道歉呀！」但願啦…
V：「好喇，我哋落返去先，唔好阻住人哋做嘢。」
佢哋三個側梯落去更衣室換衫，我哋就返埋位先。