【士㞗彈系列】《她被寄宿到鹽水男孩的家中》2K15中: K980

慕：「佢哋三個上去表演，你哋去晒後台攪乜鬼？」
我：「作為一隻忠誠的兵，當然要用最接近嘅距離為娘娘打氣㗎啦。」男班長無我咁好氣，K姐就反晒白眼，得我契妹喺度偷笑。
又原來小組樂器總共得四組，即係肯上去就有四份之三機會攞奬，我諗都係佢哋贏㗎喇；跟住就係獨唱環節，由低form開始，一個一個…聽到我瞌眼瞓。
豬：「死人叉，縮開隻腳啦，成條死屍咁。」
我：「嗯…喔！係…做乜呀？」
豬：「乜做乜呀！重有兩個到我唱喇。」係喎，佢要上去唱呢個妳真的令我很難過…
休息咗成粒鐘叫做有返啲精神，既然有熟人上台就姑且聽下啦；嗯，的確係唱得幾好嘅，起碼我聽唔出有走音。
「呢位同學唱得好有感情喎，唔知係咪曾經有過啲類似經驗令你感觸良多呢？」女MC同佢講，呢啲場合永遠就係有無休止嘅尷尬對話，實在係聽到厭連冷顫都費事打。
豬：「好抱歉令妳失望，無啲咁嘅事，我只係好專心咁唱歌。」冷靜嘅肥仔擳都唔笑用一句就打發走佢落台。
啱嘅，音樂日本身就係一個應該專心唱歌嘅活動嚟。




龜：「其實佢真係唱得幾好，可惜吖，佢又唔係女仔，如果唔係我一定推介佢唱乃木坂嘅歌。」幫QQ教大家一啲四字詞，例如以己度人，強加於人。
望住呢啲毒海浮沉嘅宅男都唔知講乜好，鍾意巴士嘅叫巴膠，地鐵就叫鐵膠，佢就係不折不扣嘅乃膠。
我：「我諗唱啲大家都識又聽得明嘅歌，贏嘅機會會大啲掛。」我決定循循善誘勸導一下迷途小烏龜。
龜：「我聽唔明普通話喎，而且乃木坂明明就好紅點會唔識。」乜嘢道理呢，即係A點去B點有巴士直達，但你行去搭地鐵巴膠會鬧你傻仔兼黐線，而佢哋永遠唔會相信呢個世界有啲人從來未搭過巴士例如幽蘭。
乃團係幾紅嘅，日本吖嘛，喺香港分分鐘連Collar都不如，就算識都唔等於會聽過佢哋啲歌…對好多香港人嚟講，最紅嘅日本女藝人應該係倉井空，三上悠亞呢啲…
Q：「乃木坂咋嘛，其實我識唱㗎。」前面嘅QQ搭嗲…
龜：「妳真係識？等妳下年上去表演囉。」如果你知道自己曾經攤喺佢大髀聽佢彈乃木坂應該會痛哭流涕。
Q：「要唱容乜易，咁你有乜表示先？」女神妳想點…
龜：「無喎，我又唔識做兵嘅。」課金啦傻仔！
其實細龜係一個好人嚟嘅，如果QQ要清空佢銀行戶口同埋兩粒蛋蛋入面嘅細胞，我諗我唔會阻止；QQ同佢互惠互利，總比去鑽石山擘開大髀接受嗰啲細胞嚟得有意義。