【士㞗彈系列】《她被寄宿到鹽水男孩的家中》2K15中: K985

Y：「是但你啦，我上嚟幫人交功課㗎咋，又唔係我要同你鬥，輸贏得失呢啲鬼咁閒。」
K：「咁睇得開，驚妳一時失手然後影響姐妹感情咋。」
Q：「專心表演啦…可能陣間我哋兩組三甲都唔入，咁咪無輸無贏囉，都唔知有乜好嘈。」
慕：「呢個可能性太低喇！如果我哋兩組三甲不入，我可以…可以…無嘢喇，算啦，總之無乜可能。」見到佢個衰樣就知想劏咗個腎出嚟畀QQ，差啲唔記得K姐喺身邊。
V：「欸…你兩個盒飯返咗嚟喇，喺有蓋操場度。」
任務完事，此地不宜久留，食飯最緊要。
落到去見到天王星坐咗喺度，最大問題係佢開咗盒飯喺度食緊隻鴨髀，係咪黐膠花㗎，明明自己出面食完嘢…
我：「喂，妳咁樣即係乜意思呀…」
U：「喂，我好辛苦攞返嚟㗎，順便幫你食兩嚿唔係唔得呀？放心啦，呢盒係佢嘅，呢盒先係你嘅…唔係諗住嗰幾粒魚蛋雲吞同條菜食得飽我呀，連粉麪都唔准嗌…」
我：「哈，妳惡呀，竟然唔聽幽蘭話，信唔信我…」




U：「你敢！本來我就唔需要聽佢話，唔好唔記得你今年係要聽邊個嘅話呀。」
我：「人哋係為妳好咋，陣間上台喉嚨痛點算好？」
U：「你有無常識㗎，就算痛都唔係呢幾個鐘嘅事呀？咁你又嗌，唔驚陣間啞咗咩？」唔好唔信邪，其實食熱氣嘢太過份嘅話一個鐘後就可以嚟料。
我：「唓，又唔係我要唱歌，一人啪晒成隻燒鵝都重得呀，嗱，到時妳出暗瘡嘅話我實笑死妳。」
U：「低B，唔抵得我青春呀，食完喇，還返畀你。」佢抹完嘴就上返去…攪笑，食咗落肚係咪要嘔出嚟還畀我？
健：「服咗你，都唔知係鬧架定喺度耍花槍。」
我：「佢霸道到咁，鬼得閒同佢耍呀，咪喺度食啦。」
健：「點解唔喺度食，去邊食呀？」
我：「得返十五分鐘唔夠，你想鯨吞虎嚥咩，今日呢啲日子，跟我嚟啦，返課室慢慢食一定唔會有人捉。」
健：「吓，得唔得㗎，呢啲衰咗坐底缺點㗎喎。」




我：「得啦！你唔記得咩，呢排都係我管鎖匙㗎，學校有活動我鎖門確保安全好合理吖，反正我今年重未收過缺點。」以前單單係遲到都可以記一兩個。
我哋攞住盒飯偷偷地喺後樓梯嗰邊上，去到課室果然一個人都無，於是就反鎖自己喺入面開餐；而由於門口係有玻璃位嘅，所以就坐喺肥豬思韻嗰邊靠磨砂窗無咁易睇到…
我：「算佢啦，有留返塊皮畀我，叫做聽幽蘭話。」
健：「你食佢口水尾食得好開心咁喎，我頭先睇住佢係用牙撕塊皮出嚟。」你啲注意力有無咁無聊？