【士㞗彈系列】《她被寄宿到鹽水男孩的家中》2K15中: K992

呢種日本動畫公司水準嘅製作，明顯就係幽蘭喺度攪事；我相信佢講一聲乜嘢環境唱乜歌，佢公司自然就會有勇者出嚟搞掂晒，天王星就算屋企有成噸牛扒…就或者比得上嘅。事前就連我都被蒙在鼓裡，完全唔知佢哋乜嘢葫蘆賣乜藥，今次俾易小朋友講中咗，但似乎佢哋唔止要整色整水，而係要大放異彩，相信嗰幾條契弟而家歌都未聽到就已經睇到眼瞏瞏。
Z：「咦，乜又到我哋上台嗱？」音樂組三隻出去先。
Y：「無辦法啦，為咗姐妹，今日要加班喇。」
Z：「好緊張呀，咁我哋而家要表演乜呀？」
Y：「重問我？妳都孭住咗個結他啦…」
Q：「妳兩個唔使匿埋喇，夠鐘出嚟上台。」
睇嚟，佢哋嫌出場時間唔夠，要整多場迷你話劇先…
呢個時候有盞射燈投射落靠近後台呢邊，然後幽蘭就走咗入去。放心，我哋學校唔會有啲pro到可郁可換色嘅射燈，就算有都無咁多人操控啦，所以幽蘭係跳入個兔仔圈咁樣，然後又向台下觀眾行咗個公主禮。
V：「小女子幽蘭，係今年嚟呢間學校插班讀中四嘅，先同大家問好。」有時我會覺得佢係假膠…
Q：「喂喂喂…妳喺度讀咗三個幾月㗎喇，唔使再自我介紹…」




幽蘭跳返出兔仔圈去到黑暗嘅位置，換女班長行入去。
U：「大家好，非常可惜，我今日唔係上嚟表演空手道劈鼓棍嘅，希望唔會令大家失望。」終於肯認暴力喇咩？
Y：「喂！認真啲啦！臨時夾band都係夾band呀！我哋呢個moment企喺呢個台上面都係因為妳兩個咋！」
U：「Sor，好抱歉累到妳哋加班，今晚飯盒我嘅！」
V：「妳哋應該多謝我先係呀，等妳哋多一個表演機會。」呢個女仔一生上過幾多次台，邊係我呢啲台下嘅凡夫俗子可以想象到嘅呢。
呢個時候開多一盞射燈，啱啱好打落幽蘭度；本身喺度較大細聲個哥仔走咗去啪燈制，啲女神實在唯才是用…
Z：「但係…我哋咁樣得唔得㗎…」
Y：「我就實得，咪又係拉返小提琴！」佢即時托起手上嘅電子琴拉咗幾下我愛蕭邦。
我諗台下嘅觀眾有唔少反應，但戴咗耳機嘅我就被困喺女神嘅世界，當然有專心咁留意住佢哋聲線嘅大細。
Z：「但係…我哋有人唔係玩開音樂㗎喎…」




V：「唔緊要啦，希望在…而家吖嘛。」