【士㞗彈系列】《她被寄宿到鹽水男孩的家中》2K15中: K991

QQ打開個腳架，我就將部琴放上去，可憐嘅電腦就咁放喺地下上面，連住兩條線…
然後我喺幽蘭同QQ嘅指示下，將舞台最右側嘅三角琴推去比較中間嘅位置，再將琴鍵方向推向少少靠觀眾嘅位置，之後QQ再將佢部琴對向觀眾，同三角琴形成一個大約六十度嘅夾角加小小罅，佢哋對個擺位非常之講究，無知如我當然唔明佢哋嘅用意，因為band房哪來三角琴。
順帶一提，右手邊係用我哋視角嚟計。
最後佢哋好專業咁將枝一號咪㨃落個三角琴入面。
同一時間，我留意到台下有啲動靜，本來坐喺走廊同角位負責看住三部cam嘅攝影學會同校園電視人員加多咗兩部cam喺台嘅正前面，重將個腳架升到有咁高得咁高。
係喎，YY話要買通佢哋，但唔知係想點呢？
唉，始終都係掛住德爺，嗰種明知佢係鹹濕但又一副碇源堂睇裸女目無表情嘅style係得佢先做得到。
呢條阿發有啲風騷，肯撚定重淫過瘟神，無乜藝術感。
所謂藝術觀色，就係要深切思考女仔嘅裙底有無著啱底褲，會唔會內外相沖，又或者顏色唔配當事人命格。
V：「陣間要反轉嚟彈喎，會唔會唔慣呀？」




Q：「要妳彈結他妳都未唔慣，幾時會輪到我喎。」
我喺度思考緊乜嘢叫反轉彈嘅時候，佢兩個就捉返我去後台，下面又傳嚟少少嘩嘩聲。
我：「妳兩個唔係出場喇咩？做乜又返入嚟？」
Q：「Set場點同出場呀，你快啲埋位專心做自己嘢！」係喎，差啲唔記得咗，而個哥仔見到我就即刻讓位，走去布幕後面霸個靚位睇女神表演。
該插嘅線插晒，mute制彈返上嚟，音量喺中間，我戴返個耳機然後向佢哋打出一個OK嘅手勢。
點知等咗十秒佢哋都未有動靜，唔通係有嘢出錯？但佢哋又無望過嚟，喺呢個寂靜嘅環境我變得非常緊張，好擔心㩒少粒制會少咗把聲或者佢哋聽唔到嘢；突然之間，舞台上面嘅暗燈全部熄晒，唔會停電呀，明明我眼前啲機嘅LED仍然係著嘅，慢慢地個台有返少少光，但唔係上面照落嚟嘅，而係背幕嘅反射。
我當然知道係因為projector開著咗啦，而且佢係需要熱身嘅，等咗五秒左右越嚟越光，我知道呢班女神係動咗真格，無錯，簡直就係女神無雙。白幕上面展現咗一片暗藍色，上半部係夜空，下半部係水，而且重帶有輕輕嘅波浪紋，一個滿月掛喺靠近中間嘅位置，然後整個畫面有恰到好處嘅白色花瓣喺度飄。