【士㞗彈系列】《她被寄宿到鹽水男孩的家中》2K15中: 2K

慕：「點都好啦，既然妳已經練得一門手藝不如唔好嘥，或者…遲下我哋可以有合作嘅空間。」
U：「唔係我想拒絕你，但無呢個可能性，因為我其實對音樂係一竅不通…」
慕：「吓…有乜可能，明明妳頭先咁出色。」佢一副不可置信咁嘅樣，但又啱嘅，普通人又點會估到團長同佢班好姐妹可以點樣幫佢喎。
U：「呃你做乜喎，唔識就唔識㗎啦…不過我認為你哋係爭個keyboard手多啲，如果你要搵人就問佢哋。」呢個係好現實嘅答案，就算唔識音樂都知得結他同鼓啲聲會好悶，嘈底嘅音樂亦絕對吸引唔到女仔。
慕：「呢個我哋一早知…奈何我哋級無一個彈開琴又或者肯學嘅男仔，妳估我哋無搵過咩…」據我所知未至於無，但就算識彈都唔等於肯同你哋玩band。
U：「如果多個人，睇怕你哋隊名又要再改過。」
V：「唔好望住我呀，我淨係會同好朋友彈㗎咋。」
Q：「唉，你都知道我係一個唔鍾意出風頭嘅人。」如果妳叫唔鍾意出風頭，我呢啲可以叫地底學生。
Y：「啊，慕容哥哥你嚟咗呀…其實你OK嘅，頭先嘅表現唔錯，評審都認同咗你哋嘅實力，所以唔使氣餒㗎，下年無我哋攪事，個台就靠你哋繼續發光發熱撐住喇。」變態嘅女人換完衫返嚟，好想知佢當年點調戲人。
慕：「妳哋幾個真係…投降喇，多謝妳哋畀咗個機會我學習，唯一嘅安慰係…我同阿爽都係輸咗喺妳手上。」唓，又唔係比同一樣嘢，不過總之有我陪你就安樂啦。




U：「客氣…如果之後要練band早啲同我講啦，開會時間可以就嘅，或者無特別嘅話你嚟一陣就得。」
慕：「重有樣嘢想講嘅係，頭先妳喺台上面…係我見過最靚嘅女仔。」而家讚人有乜用？女並唔係咁溝㗎…
U：「多謝，唔使唔開心，等睇你下年嘅表演。」估唔到嘅係天王星竟然攬住咗佢拍背脊…
Y：「呵，俾說話妳聽呀，人哋話佢靚過妳。」
Q：「夠靚過妳咯，唔係，喺呢度嘅話應該同佢比。」
V：「又關我事…靚唔靚呢啲睇場合嘅啫，唔通我上去表演空手道會靚咩，我覺得打鼓係幾適合佢。」
又係嘅，對天王星嚟講贏咗就已經夠晒，畢竟嚟緊呢三年重要一齊共事；男班長都成隻死狗咁咯，對住妳哋無晒辦法，俾QQ請食完檸檬就俾YY玩，而家就連心愛嘅嗜好都輸埋比妳，就算對妳哋幾有興趣都唯有躺平坦然面對。
Y：「殊…殊…」佢指一指出面，原來有姣閪團喺度…
慕：「呀…咁…下星期一見喇…」講完就搦起結他走咗。
算唔算敗走？又唔算嘅，話晒都有女安慰返佢。




Y：「喂，你使唔使跟埋出去呀？露娜似乎望住你。」