【士㞗彈系列】《她被寄宿到鹽水男孩的家中》2K15中: 2K5

Q：「你娘娘對你又幾好，肯借咁多衫畀你著。」
我：「佢驚我著住Baleno企喺佢隔籬影衰佢咋嘛，同埋要還畀佢㗎，呢啲有叉嘅要還，件Y3就可以自己keep。」
Q：「Y3唔興吖嘛，咁嘅剩色T放二百都唔知有無人要。」
我：「件衫印啲乜其實都係咁著㗎啦，反而係條皮帶幾好用，實淨有質感，可惜都係要還。」
Q：「你…唔係諗住一個萍水相逢嘅靚女會無端端送樣過千嘅禮物畀你呀，佢唔係有錢到可以隨時買起你嗰隻呀，如果你想食軟飯不如多啲同幽蘭叩頭好過。」
我：「唔使喇，我是但食得飽，有機打下就生存到。」
Q：「係咩，如果以後無得睇AV重想唔想生存？」
我：「咁…唯有睇妳，唔好咁啦，睇AV又唔使錢嘅。」
Q：「好在啲AV女優唔係靠你開飯咋，如果唔係下面飽到死咗都重未有嘢食。」
我：「嗯…或者…我一年可以買一兩隻正版碟嘅。」




Q：「換好衫啦嘛，同我落去搭的士啦，呢個鐘數有啲危。」佢孭起個Loewe準備行。
我：「原來妳諗住搭的…唔怪之得一啲都唔趕。」
Q：「行啦…唔使你畀錢喇，應該一百蚊有找，陣間你食多兩啖已經喺返度。」
我：「有無咁嚴重呀…我其實食啲好簡單嘅嘢就得。」
Q：「天王星話事，無得你揀，團長揀得都唔會平得去邊啦，啱啱上網睇過平均消費要過千…得，唔好望住我，我都要食，變唔返現錢嘅。」
你估我唔知世事就係咁無奈咩，如果食少呢一餐可以返少三日工都不知幾開心…假如我真係無晒錢嘅話同幽蘭求救實解決到問題，但始終治標不治本，我寧願賣身畀YY賺錢好過，如果我有得賣嘅話。
我：「想問下…妳哋表演套衫整咗幾多錢？」
Q：「幽蘭唔肯講，大陸人手造，最貴實係件繡花恤衫，我諗除返開每人三四千，單單係請個專人去佢屋企幫我哋五個度身都起碼一二千啦，人哋唔使開飯咩。」
我：「明嘅…我只係想瞭解一下。」
Q：「唔使咁大壓力喎，每個人出身都唔同，最緊要你無嘢欠我哋，同埋唔好眼紅就得。」




我：「我自己又有乜所謂，係擔心妳啫。」
Q：「我識努力諗辦法，你盡返自己本份，好好讀書就得。」真係唔明佢亂七八糟嘅阿媽點屙呢隻QQ出嚟…
去到老尖，的士唔係停喺大商場隔籬，反而係尖東同尖咀中間啲舊街，好少嚟呢頭嘅我唔太識路。
Q：「佢哋約咗喺前面街口間七仔等，你過去先。」
我：「惜啖先。」我當然明白佢要前後腳嘅用意，但係都想扭下計先，同埋覺得去到而家咁就算俾佢啲姐妹撞破我哋喺街度惜惜已經無乜問題。