【士㞗彈系列】《她被寄宿到鹽水男孩的家中》2K15中: 2K6

到咗七仔就見到兩個人喺度，Zilvia同天王星，好明顯女神都係有唔同嘅守時程度。Zilvia著住黑色直腳薄長褲，白色花領恤衫，灰色針織褸，就係嗰啲半夜喺後巷出現都唔會俾色魔強姦嘅衣著…就奇；而天王星呢，黑色喇叭褲，白色薄top，微低胸小露臍，出面加件latte色嘅闊身有領jacket，一副女強人咁樣，雖然佢係。
我：「女班長，彼拉多主人，晚安。」
U：「易汪隻兵晚安。」Zilvia喺度笑。
呢個組合…好尷尬，我呢個不速之客都唔知可以講啲乜。
Y：「YO，你哋嚟到嗱，嗰兩個公主差唔多次次都係最遲，明明我喺學校搞到成六點先走都早過佢哋。」而家六點九，要喺學校去奧運再嚟尖咀，打的係唯一解。
U：「無辦法，靚女嘅通病嚟。」假設你未見過QQ同幽蘭，聽到佢講句咁嘅嘢實以為佢話緊自己。
Y：「係咩，人哋今日讚妳先係最靚喎。」呢個娘娘，好自然就放隻手喺我膊頭度以示主權。
U：「客氣說話妳唔係信呀，妳最清楚佢鍾意乜女仔。」
我：「可能人哋係想表達，另外嗰幾個唔靚女啫。」
Y：「我就無所謂，呢拳係代Zilvia嚟收拾你！」




我：「哎唷！今日呢度妳最暴力喇…」佢著住條黑白剪裁拼接斜切一字膊連身裙，好難形容，總之非常精緻。
U：「點解我覺得妳而家同佢重friend過Queenie同佢。」
我：「呢啲嘢有乜好比較，反正兩個都係老江湖。」我一個唔客氣就搭返住YY膊頭，呢個高度差啱啱好。
Y：「係呀？咁我祝福你同嗰個女人一世好朋友呀下…係嘞，我有個壞消息要講妳聽，其實我知妳無心再夾band，但學校點都想我哋喺學年完嗰陣表演一次，妳都知呢啲好難推…其實學生會想我哋去Christmas ball再順便表演添，但我已經堅決話唔制，因為妳兩個實唔想去。」
U：「如果同一首歌問題不大嘅…」
V：「啊，乜原來我哋學校有聖誕波㗎？」一架黑色七人車急停，大小姐以迅雷不及掩耳嘅速度抵達。
Y：「邊有吖，我哋又唔係貴族學校，但聯校嗰隻就可以自由參加嘅，更加容易識到人。」
V：「我唔使喇，識到你哋已經好足夠。」
Y：「所以我哋應該無人有需要，叫咗佢哋邀請攞第二嗰隊去，嗰四條仔似乎就緊火啲。」
U：「今時今日男班長重使唔使去呀？」




Y：「點知佢，攜眷出席囉，咁重有其他仔呢。」
U：「又係嘅，如果佢可以拖女去…似乎係會想威。」
Y：「理得啲麻煩友啦，我想問妳今次做乜肯咁大犧牲就真，大嗱嗱嘅初吻就肯咁樣畀嗰條友？」