【士㞗彈系列】《她被寄宿到鹽水男孩的家中》2K15中: 2K21

等咗一陣，有人敲門再推門入嚟，係一個著住日式服裝嘅姐姐，不過喺酒池肉林之中佢只可以算係一個下人，我就連佢靚定唔靚都無多餘嘅精力分析，剩係望到佢好斯文咁跪低，將兩碟天婦羅同埋汁由托盤放到枱上面，再講咗句日文就幫我哋閂門出返去。
有蝦啦，有矮瓜啦，有冬菇啦，重有啲綠色同白色嘅嘢，大致上都係咁，我未至於唔知係乜嚟嘅。而呢個時候，聰明如我都知道唔可以起筷先，反正就lady first啦，而佢哋幾個就望嚟望去。
A：「貴人，恭喜妳今日旗開得勝，食先啦。」
U：「咁都係多得你啫，我自己乜都唔識嘅。」
A：「既然係咁，不如我哋一人半隻？」…。
作為一隻蝦，死後俾人分屍跌落兩個唔同嘅胃度，實在係死唔眼閉呀！因為…蝦無眼皮根本就收唔埋對眼。
唔止，跟住輪到我哋眼冤，天王星佢學習能力實在好高，首先將隻蝦天婦羅拖一拖啲汁放入自己口度，再小心翼翼咁扯甩個蝦尾殼，含喺口度用個尾端對住團長。條友當然唔客氣直接嘴貼嘴零距離咁將隻蝦屍體一分為二…佢哋繼續近距離深情對望，無情咁用利齒將蝦肉絞爛。
Y：「西宮妳失勢喇，食嘢吧啦。」佢又夾起隻蝦。
我數一數啱啱好有七隻蝦一人一隻，所以我都勇敢咁夾起其中一隻，真係幾大下，長度有龜丸嗰啲嘅兩倍有多；呢個長度係無可能一啖吞晒成隻蝦嘅除非你想哽死啦，就算打橫都唔使諗，如果你玩過恐怖的百力滋遊戲就無理由唔明白。一啖咬落去，咦，打破咗我對天婦羅嘅印象，外皮好鬆脆但又一啲都唔油，入面嘅蝦肉好鮮味飽滿，完全唔同我心目中嘅日式煎釀三寶。
再望下咬開嘅橫切面，粗壯雪白嘅蝦肉喺度冒緊煙…




A：「喂，我有話妳食得喇咩？」
V：「吓，點解我又未食得住呀？」
A：「因為妳作為一個肉參，其實同階下囚無乜分別。」
V：「唓，唔食住囉，有幾閒。」佢放返落隻碗度。
A：「嗱，今次等我喂返妳嘞，益晒妳。」佢夾起碗入面隻蝦咬喺口度對住幽蘭，呢個死變態。
無奈嘅幽蘭唯有哄埋去咬落隻蝦度，狡猾嘅團長就順勢將隻蝦插入佢口直至嘴貼嘴。
A：「點呀，公主滿唔滿意呢度嘅伙食？」
V：「都唔錯嘅，但我掛住日本嘅車海老多啲。」
A：「妳都幾好嘢㗎喎，人哋唔係用車海老妳都知。」
V：「點同呀，車海老彈牙咁多。」




A：「何解一個西域公主唔好地地牧羊走去食海鮮呢？」
V：「哼，你理得我吖。」