【士㞗彈系列】《她被寄宿到鹽水男孩的家中》2K15中: 2K31

我：「嗯，最尾一句就係重點嚟。」
A：「中四嗰年嘅暑假係我哋最開心嘅日子嚟，又咁啱我哋都喺暑假生日，所以就一齊做咗啲好刺激嘅嘢嚟慶祝十六歲生日，自從會做呢樣嘢之後，我哋都相信以後只會越嚟越好，就喺咁嘅情況之下升中五。」
我：「嗯，似乎都係幫自己立flag…」
A：「到咗中五，大家就更加忙，又要顧住學會，又要讀書，詏撬自然就更加多，有排佢發緊脾氣，而我就要幫另一組玩管樂嘅女仔寫arrangement，其實我無嘢嘅，忙到兒女私情都唔記得諗咁滯，後尾佢哋又係贏咗話要搵埋我慶祝，當時條女激到我得返半條人命，又見佢哋係三個女仔一齊出嚟，咪諗住無嘢囉，點知係一個局嚟。」
我：「講到好委屈咁，迫你同佢哋上床呀？」
A：「咪發夢啦，中學生嚟咋…咁佢哋有一個一直都鍾意黐埋嚟嘅，嗰日佢最早到，咪行住街等另外兩個囉，妳都可以估到佢哋放飛機，當時已經心知不妙，但諗住話晒都係識咗咁耐嘅朋友，咪打算好嚟好去同佢食埋餐晚飯囉，我好有信心自己唔會亂嚟，當晚佢其實無乜嘢，只係黐多埋嚟少少，同埋係咁打聽我拍拖拍成點，已經掂過女人嘅我當然唔會因為呢少少誘惑就做錯事，嗰日完咗後諗住無嘢，點知咪又係嗰啲閒言閒語同埋中傷…我唔講咁詳細喇，妳係女仔無理由唔明，我條女大發雷霆，我梗係堅持自己無做錯事㗎，而且無可能以後唔同其他女仔交流，跟住我哋展開咗漫長嘅冷戰，大約過咗一個月，佢又係講埋嗰啲乜嘢我死性不改，自以為是，唔珍惜佢嘅說話同我鬧分手，嗰陣其實我已經頂佢唔順，加埋開始唔鍾意佢，咪成全佢放手俾佢走，後來我聽到佢好快就同一個中六泳隊嘅師兄撻著咗，我諗冷戰緊嗰陣已經不停俾人餵毒藥。」
我：「你咁受歡迎，做你女朋友又真係好難忍嘅。」
A：「我當時已經好收斂，同所有人講已經有女朋友，盡可能避開晒其他女仔㗎喇。」
我：「啱呀，唔好諗住保持身邊成堆女係一件易事。」
A：「所以我覺得阿爽真係好勁，好似有超能力咁。」




我：「關乜嘢事喎，佢單身嘅，而且只係因為我哋幾個女仔太好朋友啫。」
A：「就算係咁…佢同妳哋都係太曖昧喇，唔係幾想見到妳哋因為佢而炒大鑊，我諗妳對佢無興趣㗎啦，如果第時出事嘅話就幫手勸下啦。」
我：「佢兩個大個女，我插唔到手㗎喇，呢啲嘢我諗佢哋自己謦掂好啲…不過聽你咁講，你都係因為需要而拍拖，因瞭解而分開，無乜特別啫，做乜攪到而家咁？」