【士㞗彈系列】《她被寄宿到鹽水男孩的家中》2K15中: 2K60

Y：「吖，行到有啲攰，不如搵個地方坐下咯。」妳有啲攰，咁我呢啲叫乜，又唔係行我鍾意嘅鋪頭。
Q：「好在有你，原來可以搦住咁多嘢行咁耐。」
我：「應該嘅，如果唔係嚟陪妳哋行街有乜做…」
Y：「對佢嚟講濕濕碎啦，乜妳無同過佢行街㗎咩？」
Q：「梗係無啦，我點會無端端約佢出嚟行街，唔通你兩個會約出嚟行？」QQ妳呢啲乜眼神嚟…
Y：「咁又無喎，係叫過佢幫我托書啫。」估唔到佢會講真話，可能驚講大話會連自己都唔記得。
Q：「哦…不如過對面街M記坐咯，呢期有十八隻麥樂雞餐。」屌，妳哋啲港女口味真係好dynamic。
呢間M記比較偏僻，重要行樓梯上二樓，我哋揀咗一張最入嘅四人枱，佢兩個靠牆坐，對面兩張散凳放完一袋二袋之後已經無晒位。是但啦，橫掂我都要出去買嘢，話晒頭先食咗佢哋一個兩嚿幾嘅漢堡同收咗份西班牙地圖吖嘛，打開個App用優惠券嘟落部機度，再加大，要紫菜粉…好彩都只係五十幾蚊，但已經夠我張八達通變成負數，無辦法啦，我又唔使日日搭車所以入面唔會放太多錢。
我：「一杯加大zero夠妳兩個飲？我飲水得喇。」我放低個托盤喺佢哋前面，諗緊可以去邊撻多張凳嚟放嘢。
Q：「杯汽水留返畀你啦，想麻煩你出去幫手拎…」




Y：「吓，妳幾時嗌㗎？做乜又唔問我嘅…」
Q：「無呀，我都懶得睇，所以畀咗個定位某個哥哥，叫佢幫手嗌兩杯嘢飲咋…」
Y：「啊，妳鬼馬喇，原來又有哥哥喺度追緊妳。」
Q：「無呀，佢講到明唔追我㗎，大我好多…唓，我寫包單嗰日表演完之後咪又係有仔追妳…」
Y：「哎吔，呢啲再講啦，都無當過佢哋係一回事，咁你個哥哥喺邊識返嚟㗎？」乜哥哥？睇直播嘅仆街甜故作者一個，麻甩得嚟又有啲錢咁。
然後我就靠住張號碼硬圖去攞嘢飲，正一仆街嚟嘅，點解唔可以嗌返M記，要我又走返去TOP嘅台茶鋪…桂花烏龍雙奶不另加糖，紅柚烏龍蘆薈Q半糖，真係寫得鹹嘢多就連嗌杯嘢飲都要揀啲淫啲嘅，又雙奶又紅柚想點喎。
結果真係全日喺度做牛做馬，都唔知開心定傷心好。
我：「嗱，妳兩個杯嘢飲呀。」既然無分邊個打邊個，索性兩杯放晒喺佢哋中間，再思考我可以點坐低。
Q：「喂，傻叉叉過嚟吖。」佢行出嚟叫我坐入去。
以為佢想叫我同易汪坐，點知坐低咗之後又迫埋落嚟。




我：「咁樣…似乎係會有少少迫。」隻手亂郁會揩波。
Q：「有乜所謂喎，我哋同你咁好朋友。」