【士㞗彈系列】《她被寄宿到鹽水男孩的家中》2K15中: 2K59

Q：「我識分㗎，呢隻係…渣古，唔係高達。」
我：「呢隻係seed嘅基因…唔係0079或者seed D嘅渣古。」咪扮嘢啦，未睇過嘅女仔有乜可能識分。
Q：「咁都啱一半啦，即係唔係高達。」簡單嚟講，佢嘅邏輯就係分到動物同植物就係佢贏。
Y：「鬼死咁肉酸，唔通你鍾意？係就攞啦。」大口氣得妳吖，雖然高達無妳哋啲包包咁恐怖，但少至一盒三四十嘅低B戰士，貴至三四千放喺下層嘅Metal Build都係有嘅。
但問題係，無端端鑿妳一筆即係我又要出返一半，而且我未算係好鍾意高達；最大問題…砌完根本無位擺。
因為我張書枱已經分咗一半畀QQ放佢嘅嘢例如化妝品…
我：「呀！妳哋有無Steam account呀？」
Y：「有就有嘅，雖然我無乜玩。」
我：「不如妳送貨櫃車嘅西班牙地圖畀我吖，今個禮拜做緊半價呀！」只要買埋我就齊晒所有地圖。
Y：「唔知你講緊乜，但我可以點樣送畀你？」




我：「我send條link畀妳啦，重有我account。」
Q：「無出息，有高達唔揸走去揸貨櫃車。」唓，我重玩緊GVG嗰陣妳睇唔到咋嘛。
Y：「吓…原來妳真係有期望過佢可以有出息㗎？」
喺人哋間鋪滾攪咗陣我哋又離開咗，理所當然咁嗰兩大盒美少女戰士又落咗喺我手上…攞住。
我：「咁我哋今日嘅任務係咪已經完成晒喇？」
Y：「無錯，不過既然有人幫我哋攞嘢，不如行多陣街咯？」佢捉住QQ隻手。
Q：「又好啫，我實無所謂㗎。」
我：「吓…咁我要攞住呢三袋嘢行到幾時？」
Y：「吖，有得跟住我哋兩個靚女行街，知唔知有幾多仔恨都恨唔到。」佢講得無錯，但我並唔係佢口中嘅嗰啲幾多仔，因為我至少喺佢哋身邊射過精。
只不過我別無選擇，我要扮到好沉迷QQ，平時根本就無機會同QQ獨處，所以我係應該義無反顧咁跟住佢哋。




Q：「不如我哋去行下TOP咯。」
其實行乜都無分別，因為對男仔嚟講，手又無得拖，水又無得抽下，跟住兩個女仔行街係慘…唔過喺屋企做毒撚。
平心而論，我想即刻衝返屋企開車去西班牙兜返轉。
慘情嘅嘢唔需要講太多，總之就係搦住一袋二袋陪佢哋喺商場轉來轉去。行得耐佢哋自然就有收獲，首先係買咗對一模一樣乜嘢Rockport爧面凱西返學皮鞋，然後就係一對同款唔同色嘅波鞋，YY橙撞綠，QQ粉紅撞紫；都唔知佢兩個係咪專登玩我所以先唔買衫走去買鞋…重撚到，我唯有內心鞋鞋聲咁嘅樣。
佢哋啲牌子鞋，雖然有少少折頭，但兩對加埋就肯定過千，希望QQ啲收入頂得住啦…