【士㞗彈系列】《她被寄宿到鹽水男孩的家中》2K15中: 2K71

慕：「其實…都無乜嘢嘅，坐新位開唔開心呀？」
我：「開，梗開心㗎，有靚女喺隔籬我就開心㗎啦，不過點都唔夠你開心。」
慕：「哈，有幾呀…你都幾得意，其實你對靚女嘅定義係乜？」點講都好，呢條友嘅睇法一定膚淺過我。
我：「好簡單啫，邊個坐我隔籬咪邊個係靚女囉。」
慕：「Well…你呢啲係乜嘢火星邏輯嚟㗎？」
我：「因為…前面得個背脊，上堂要專心又唔可以擰去後面望，所以剩係望到隔籬位，咪佢最靚女囉。」
F：「好嘢呀你，轉個彎嚟話我唔靚。」
我：「證明唔到妳係靚女都唔等於唔靚嘅，坐前面嘅女仔係背多芬，有另一種味道。」
F：「陣間我話畀你娘娘聽你話佢唔靚女，睇你點死。」
我：「我怕佢老鼠咩，唔使望都知坐我後面嘅女仔靚過佢啦，講事實唔通唔得，你咬我食呀？」




F：「哦，但你後面位女仔聽到你講佢望住你喎。」
我：「唔信，只要唔望住佢，佢都望唔到我嘅。」
K：「點呀，係咪真係坐前面嘅女仔無咁靚，有乜高見？」K姐擰過嚟望住男班長質問佢。
慕：「唔覺囉，之前同隔籬位坐咗咁耐，一啲都唔覺得佢靚，至少…而家眼前呢個前面位靚啲。」天王星到底靚唔靚？其實好睇你品味，而事實上K姐作為姣閪之首亦都係個樣擺喺度，至少如果係佢姣我而唔係阿花我會更頭痛…
K：「咁如果同而家嘅隔籬位比呢？」女人真狠毒。
慕：「而家坐我隔籬位嘅…係…一嚿叉燒。」望我做乜。
K：「我係話而家座位表嘅隔籬位呀，咪扮聽唔明。」
慕：「啱啱先坐低…未咁快下到定論嘅，但我覺得討論靚唔靚無乜意思，一個人嘅內涵係比較重要。」
我：「無錯，所以我從來都唔怕認自己鹹到爆，勇敢講個事實出嚟啦，例如，而家你前面位靚過我前面位。」
F：「死叉仔，好想打爆你個頭呀，雖然係事實…」




K姐望一望我，唔知係開心定點，但靚過自己個姐妹又有乜用吖，轉過頭又繼續嬲爆爆咁望住男班長。
「呀，唔好意思，我記得…天行你好似係班長嚟？」
慕：「啊…我係呀，請問兩位師兄係…有事搵我？」
「唔係，想請教下你啫，後面呢個週期表係咪可以用嚟寄信㗎？」整就整到傻，玩咗幾日然後就變成裝飾。
慕：「可以嘅，但都係得我哋班自己用，如果你哋想…」
「呀，想問下…邊幾格係屬於QuzVy嘅？」
V：「啊，你哋有信畀我哋呀？直接啲都得㗎！」
災難…我都懶得check佢哋啲page各自多咗幾多like，但一到小息已經有好多人伸個頭入嚟左望右望。幽蘭以前讀女校，就算彈琴彈到識飛都只會惹嚟更多妒忌嘅目光，而家變成一大班仔喺度迷佢哋又點可以唔眉飛色舞。