【士㞗彈系列】《她被寄宿到鹽水男孩的家中》2K15中: 2K72

「唔係幾好意思嘅，呢度有好多封，我哋都係幫人…」
我：「咁一定係！你嗰封就佢幫，佢嗰封就你幫，係咪？唔緊要㗎，我好好人幫你哋分發晒都得。」
「爽大佬，唔好玩我哋啦…」好似驚我睇完碎晒佢咁。
我：「Sor，我唔係大佬，只係一個小弟，師兄就不如…」
U：「Myth，你就話畀佢哋聽邊個位啦，唔好煩…」
男班長講過輸咗會聽晒佢話，家陣囈都無得囈。
K姐當然唔多滿意，但又無一個合適嘅身份嚟為佢出聲。
見到有人成功，自然就有其他人有樣學樣。而咁熱鬧嘅環境， 就吸引埋啲蛇蟲鼠蟻過嚟。
發：「嘩，受歡迎得妳哋吖，今日用埋個lunch幫妳哋趕條片，下個禮拜五唔好放飛機呀下。」
Y：「知喇，咪扮嘢啦，肯定大部份都係阿意剪嘅。」




發：「期待呢，好高興可以為茜旎妳做攝影師。」
Q：「哦，客氣，互相幫忙啫。」啲港女假到一個點。
「想問下妳哋會唔會再有機會演出㗎？」
「佢哋應承咗暑假前會再表演一次。」係學生會會長…
「睇唔出喎，田徑場外都有妳發揮到嘅地方。」某社長…
瘟：「一早同你講過，呢班女係好犀利㗎啦！」
「非常期待，我諗今年嘅啦啦隊表演一定更加精彩！」
「師姐…我想問下，有鋼琴三級…嘅話有無機會入到音樂組，重報唔報得切？」
「師姐，我哋都想組隊女band呀，唔知有無機會向妳哋請教下呢？」連迷妹都出現埋。
Y：「其實…我哋無諗住夾band，一日限定㗎咋。」




「點解呀，明明咁精彩，實在係太可惜喇。」
V：「通常最美好嘅嘢，就只可以係剎那光輝，所以好抱歉無嘢教到妳哋，最多…簽返個名送畀妳哋。」
「我又要！女神，我都要！我衝返去攞紙！」呢班友…
「攞乜嘢紙吖，printer入面咪大把A4紙。」
V：「唔簽A4紙，容乜易變咗做賣身契㗎？」喺乜嘢環境成長先會令到個女仔成個腦都係呢啲嘢？
「唔緊要啦，手機殼得唔得呀？有無箱頭筆？」
瘟：「你哋使唔使高潮成咁呀？我有一幅相就夠。」
「頂你吖！重講！公器私用信唔信我port你？」
瘟：「無呢回事，我只係同社員喺學校活動影相。」
「咁串嘴，真係唔推你埋牆角corn都唔得！」




雅：「夠喇！呢度人哋課室嚟㗎！同埋啱啱預備鐘已經響咗喇！」嘩，副head P發惡喇，連學生會會長同社長都唔畀面，但無辦法啦，始終風紀呢個組織先係最接近學校嘅權力中心，而且通常可以一直做幾年。
就係咁，佢哋收到十幾廿封信，慳返個簽名。