【士㞗彈系列】《她被寄宿到鹽水男孩的家中》2K15中: 2K77

將啲液體倒來倒去，然後點火，得到一堆灰又溝返水用試紙檢查，其實我都唔係好知做咗啲乜，明明鹽係鹹嘅，點解又會有酸性呢？
我：「一齊食？」重會有邊個吖…
健：「但係…今日約咗佢一齊食。」指住思韻。
Y：「唔好望住我，咪成日黐埋嚟，免得惹人誤會。」
我：「睇嚟…今日我可以返屋企訓返個晏覺。」
J：「你鍾意咪過埋嚟一齊食囉，有乜所謂。」
我：「我可以㗎…係唔知道會唔會阻住你兩個啫。」
J：「妖！佢又唔係要溝我，我又唔係冧佢，有乜好阻？」
我：「點知喎，做人有返啲假設性係會安全啲嘅。」
據我所知思韻同QQ差唔多情況，由中二開始同初戀男朋友拍拖到而家，所以以女仔嚟講算係比較開明？而係飲食方面都幾貼地下，喺我無意見下佢哋揀咗去食米線。




呢啲米線鋪有個優點，中間有啲細圓枱令到我哋唔使諗點樣坐，因為左旋同右旋嘅化學性質應該唔會有分別？
我：「你兩個又會突然之間約食飯咁得意嘅？」
J：「有幾突然呀？見一齊坐咪約出嚟食飯囉。」
我：「咁其實由開學Lab堂已經一齊坐㗎啦，唔係咩？」
J：「隔咗易汪同埋你就唔叫一齊坐㗎啦，而且見佢今年咁大轉變，咪多咗啲嘢係想八下咁。」
我：「恭喜你喎，兄弟，今年好大轉變…」
J：「嗯，都係想八下佢拍拖拍成點咁囉。」
健：「你哋咁樣講…會攪到我唔好意思…」
我：「哈，你好意思唔好意思嘅，而家乜都超越晒我。」
健：「又未至於嘅…起碼我無得俾五個女神圍住。」




我：「起碼你今日約到隔籬位食飯，而我約唔到。」
J：「咁係你唔出手啫，你嘅話要約K姐實有辦法嘅。」
我：「咪攪，攞嚟煩，隨時揦屎上身。」
J：「乜你會驚嘅咩？重以為你係天不怕地不怕，唔知你係驚得罪Queenie吖，阿花吖，定係男班長呢？」
我：「個個都唔驚，只不過係唔鍾意刺激到任何人。」
J：「見到個新座位表我都嚇咗跳，好似明攪事咁。」
我：「唔出奇嘅，上次座位表嘅原則係跟返山頭嚟坐吖嘛，今次就擺到明係想打亂㗎啦，可能Miss自己都唔知結果有幾黐線，不過佢依然係得益者，繼續有得同女坐，唔使隔條河添。」對健仔嚟講改變應該係最細嘅。
健：「都係呀，同妳坐好過同易汪坐啦。」識賣口乖…
J：「係咩，話晒易汪假假地都係女神，太唔珍惜喇。」我都覺，健仔一直唔多鍾意佢，細龜又當佢無到，極其暴殄天物，知唔知學生會嗰邊有幾多條仔睺住佢先得㗎。