【士㞗彈系列】《她被寄宿到鹽水男孩的家中》2K15中: 2K80

J：「我都唔知佢算唔算俾人教壞，始終佢女朋友係成年人，同我哋唔同嘅，而且佢又係男仔。」
我：「係，我都知我哋未夠秤，所以而家我好乖㗎，但唔代表成年人就可以亂咁嚟嘅，至少唔會所有人係咁。」
J：「我應該無同人講過，其實我男朋友都大我好多…所以呢…雖然而家叫同易汪佢哋熟返，但都好少同佢哋分享拍拖嘅嘢，話晒每個人睇法係唔同嘅，但我就覺得拍拖其實係兩個人嘅事，只要唔影響到人，佢哋相處到咪得。」
我：「妳男朋友好大…點樣識返嚟㗎？」夠奇怪就想八…
J：「係我中一個學姐嘅哥哥嚟。」
我：「我哋中一…學兄學姐就中五，佢哥哥最少中六，我哋而家中四即係要加三年…」
J：「唔使估喇，佢今年year4，最後一年U。」
我：「唔怪得妳同佢咁好謦啦，完全睇唔出妳有個咁嘅男朋友，但妳唔係想同我講…大學個個都玩呢啲party呀？」
J：「無咁嚴重，但好難搵到個好純㗎喇。」
我：「嗱，妳都識講，佢係仔嚟可以由得佢去死，但妳唔會係俾人呃吖嘛，雖然我立場係開放自由唔多理人。」




J：「呃？第一日可能係嘅，無人會咁好心機呃足三年。」
我：「三年都好長…係咪應該經歷過唔少難關？」QQ又係中二開始嘅，YY都好似差唔多，而我…算吧啦。
J：「就我所知，佢出軌都出咗兩次。」
我：「吓…咁妳係容忍到？定已經接受咗…」
J：「又未至於接受，但一時戀愛腦就係咁㗎啦。」
我：「咁樣好咩，佢就話準備好睇住條女俾其他仔食啫…」然後好擔心食人哋條女嗰陣失威。
J：「我想㗎咩…當初都可以話…算係搶佢返嚟。」
我：「嘩，原來妳咁犀利，搶到個大學生返嚟。」
J：「犀乜利吖，係我想搵補習，佢又想試下搵外快但無經驗，師姐咪叫佢幫我補下咁囉。」
我：「原來係補習妹…真係會補到上床。」




J：「鬼叫佢個EX低Q能，黐身到爆，知佢同女仔補習就係咁打嚟煩，脾氣重衰過易汪，大使得嚟重要唔靚女，當時我係有少少睇唔過眼，佢又心情好差，本身係為咗想搵錢拍拖先同我補習咋嘛，但我哋唔係補習嗰陣一齊㗎，後來佢暑假去咗補習社兼職，同條女分咗手，我哋先一齊。」
我：「事實證明，佢條女嘅擔心係正確嘅。」
J：「關乜事吖，佢根本係想完全操控條仔先出事。」
我：「聽到未，所以你千祈唔好諗住操控阿欣呀。」
健：「咪講咗我已經接受咗，唔好燒落我到。」
我：「但係點解佢會揀妳嘅，係咪因為妳所以分手？」
J：「因為我好囉，同埋我可愛囉。」
我：「妳認真？雖然我唔係話妳講大話…」