【士㞗彈系列】《她被寄宿到鹽水男孩的家中》2K15中: 2K98

Q：「又唔使即刻起身嘅，不如…去睇下我哋個IG？」
我：「妳哋IG？睇下一日又多咗幾多個like？」
Q：「吖，雖然我就喺你面前啫，都唔使咁唔關心㗎？好歹你自己有份演出㗎，雖然無出鏡啫。」
我：「咁…我開嚟睇下啦。」啱嘅，我知道呢個世界大把人羨慕我，但我每一日嘅生活就係圍繞住佢哋…
唔玩IG嘅我，部電腦嘅登入權早就拱手相讓咗畀QQ。
我：「乜話？！3K like？咪即係我哋學校人口嘅幾倍！」
Q：「咁大驚小怪做乜，我直播嗰度都過千粉啦，你自己㩒入去咪知點解囉。」相比之下我就係一個笑話。
我都知妳哋個戶口係公開，但明明話今日lunch先整好，只係短短幾個鐘就…一打開就見到個黑幕，剪接組幫佢哋整咗個開場都係罐頭式咁打返間學校名同隊名，然後就借埋幽蘭段登場片放入去，去到正題先係一個wide鏡，然後每個人講嘢嗰陣竟然有close up！雖然幾個妹啲對白夠晒尷尬，但喺靚樣同美腿嘅襯托之下又算得啲乜呢？
就同喺幕後䚎出去睇嗰陣一樣，但睇片嘅感覺係非常之接近，變身嗰下暴露出五對美腿嘅畫面都有好好記錄低。
開波由幽蘭嘅鋼琴聲開始，當時我聚精會神喺面前塊panel所以之後嘅乜都睇唔到，而家睇返塊布幕即時播放佢哋嘅畫面，女神大頭真係好震憾！然後到易汪拉起小提琴，幽蘭攞起電結他離開三角琴行去台前，QQ接管咗左手邊嘅三角琴同右手邊嘅鍵盤，一舉一動係非常之順暢。




我：「點解…要交叉手彈嘅？」當時唯一䚎到嘅一幕。
Q：「因為慣咗右手彈主音左手彈伴奏所以就咁，我都係出場前先有呢個決定，但啲觀眾似乎好受落，嘻。」
望住QQ嘅近鏡，佢真係非常有型；到唔使彈主音嗰陣佢又用右手彈返鍵盤，令人覺得佢可以自由咁隨心所欲。當然，拉電子小提琴嘅易汪亦非常之誘惑，尤其係佢詭魅嘅眼神；非常享受企喺舞台表演嘅幽蘭，不動如山一樣斯文嘅Zilvia，重有熱血揮舞鼓棍嘅天王星，全部都好吸引。
全片加咗大量嘅過場同疊鏡，每個女神都有公平嘅畫面時間，鏡頭盡量影住各自唱歌嘅畫面；雖然睇得出係好陽春嘅學生製作，只係靠台下幾部cam嘅仰角畫面所以比較單一，但無論如何都比平時嘅一cam wide鏡直落到尾式記錄強太多，再加埋布幕上嘅無限疊影直播…
Q：「點呀，係咪覺得易汪好偉大呢，今次可以話係佢嘅功勞，就連校園電視都係第一次咁製作。」
我：「嗯，睇得出全世界都係為咗妳哋先咁落力，但前提係要妳哋有呢個實力…加埋仙女咁嘅外表。」
Q：「你唔好剩係用眼睇先得㗎，呢個音樂日嚟㗎。」