【士㞗彈系列】《她被寄宿到鹽水男孩的家中》2K15中: 2K103

今日係幸福嘅一日，因為唔需要再晨咁早返去開門招呼班大帝，變返最後兩分鐘先入課室；無計啦，鬼叫我住得近，就算控制到三十秒內都唔係乜嘢難事。
而家每次行埋位都會經過契妹，佢今日戴黑Bra，唉…
K：「嘻…嘿。」精神病嘅女人其實係好恐怖嘅生物。
我：「妳個樣…幾醒神咁喎，開心？」
K：「OK啦。」真正嘅快樂係唔需要太多描述。
我：「破咗處嗱？」所以我都直接觸摸問題嘅核心。
K：「黐線㗎咩…你當我係乜？」
我：「無呀，妳都知我比較開明…呢啲嘢妳自己決定啦，我又唔覺得係乜，見妳咁開心先問下，妳唔鍾意咪唔好講，我尊重妳嘅，反正只係正常人生嘅一個環節。」
K：「琴日…我上咗佢屋企…不過我哋無做…係玩咗下，但係已經幾開心，大家都覺得唔應該咁急。」
我：「得，明晒，呢啲係你哋嘅私事唔使講咁詳細。」




K：「你真係明？」點解呢個女仔可以姣得嚟又天真…
我：「當然，妳當我係乜。」我咪又係年幾無攪過，但身邊全部女…單單係坐前面嗰位已經夠晒精彩。
係妳先會暗戀呢個低能班長四年，而個班長又剩係識真心膠纏住啲女神，可以話係絕配，我表示無眼睇。
鄧：「早晨，咁多位同學，我未改完簿呀，所以落返去先，你哋乖乖地安靜等下一堂先生嚟啦…」所謂嘅十分鐘班主任節咁就完咗，聽聞呢排低form要俾校長check功課，肯定係個無責任老師顧住拍拖唔努力工作。
對住個咁嘅先生，我哋梗係連O嘴都費事繼續謦欬。
我：「鍾意人就畀心機啦，重有兩年半要對住㗎。」
K：「你乜意思先？好似喺度咒我哋無好結果咁。」
我：「先唔係囉，我呢啲叫平常心呀…喂喂…佢好似唔多妥咁望過嚟喎。」我同佢最左最右，當一齊同身邊條女講嘢嗰陣就會對望，其實都幾尷尬。
K姐回敬返佢一眼，然後就喺櫃桶㩒電話。
K：『你唔係呷個低B仔醋呀？』重加多個思考中嘅公仔…




嗱，唔係我有心偷睇佢，可能佢溫得太多書又唔認自己係近視妹，所以啲字體都幾大隻下，兼重要用手寫輸入…
而我呢，打機係唔會近視嘅，兼且要一路同隊友溝通或且溝女，所以就迫出一手好倉頡出嚟。
慕：『無妳咁好氣，唔好要男班長提醒妳上堂時間唔用得電話，我對功課先。』佢又真係同QQ一齊對功課。
K姐瞪返佢一眼，又做咬咬表情兼夾伸脷，恐怖…
無話扮唔扮嘢嘅，佢兩個都係勤力又認真嘅學生嚟，如果係同學業有關嘅事宜QQ似乎係唔會拒絕。