【士㞗彈系列】《她被寄宿到鹽水男孩的家中》2K15中: 2K134

F：「我都覺，你成年人工應該未夠買個手袋畀佢哋。」
我：「我都唔知夠唔夠，總之唔會做呢啲低能嘢。」
F：「有平有貴嘅，茜旎個銀包都要兩三千，你可以考慮下 。」考慮幫手賣咗佢，隻QQ唔係無咁諗過。
我：「個格仔銀包？聽聞係佢條仔送畀佢。」
F：「相對嚟講佢個書包好平，新秀麗一千多啲。」好平…我都唔知，剩係知佢暑假嗰陣自己買。
我：「妳好熟呢啲嘅咩？」
F：「普通啦，女仔點都會睇下嘅，最貴應該係幽蘭個RIMOWA，好似要五位數，易汪個TUMI同埋班長個BAOBAO都唔平，我估要三四千。」
我：「天王星個LEGO袋咁貴嘅咩？無個識…」
F：「學校話唔建議用LV，GUCCI吖嘛，佢哋咪搵埋晒啲無人識嘅貴價商用袋囉。」
我：「咁Zilvia又用乜書包㗎？」




F：「無特別，好似係啲三四百嘅百貨公司款。」好正路，佢啲錢係跌晒落隻彼拉多度，剪一次毛都唔知幾多…
我：「乖乖女吖嘛，邊似得幽蘭買枝電結他玩一次都一萬幾千，然後話留念唔會賣返出去。」
F：「正常嘅，但Zilvia啲長笛都唔平㗎，佢重要唔止一枝添。」
我：「其實要多過一枝嚟做乜？」唔通有電子笛嘅？
F：「唔同key吖嘛，你唔識㗎喇，所以呢…我唔覺得你黐埋去佢哋度有乜用，有得食嘅機會極之渺茫。」
我：「真心朋友又點會講食唔食呢啲。」
F：「你係認真咁諗？」
我：「係呀，雖然靚女就係仔都鍾意㗎啦，但識耐咗之後就發覺做朋友都非常好，又唔使擔心爭風呷醋。」
F：「你想親近晒咁多個女神咋嘛，唔好以為我唔知，但我想問下，雖然知道你最冧係Queenie，假如另一個女神追求你嘅話，會有乜打算？」
我：「呢個假設太科幻，至少我知嘅現實係唔會發生。」




F：「你都幾坦白㗎喎…幻想下啦，可能易汪想做你SP。」
我：「我諗…唔會簡單咁答應囉，又唔知佢想點，如果真係發生呢啲事好難唔影響我哋嘅關係。」
F：「咁如果係Queenie呢？」
我：「我會尊重佢一切嘅決定，就係咁。」
F：「其他幾個女神都無行，我就真係唔使諗…但係你真係唔想拍拖咩？」
我：「唔係話唔想拍，但如果為拍拖而拍，其實只係好似身邊多咗個女仔咁，而我而家身邊已經夠晒多女…如果係為咗性，又好似對個女仔好衰咁，我覺得呢，真正咁鍾意一個人係一定要必需同埋自然嘅，而唔係計較對方優點缺點，對自己有乜益處咁。」