【士㞗彈系列】《她被寄宿到鹽水男孩的家中》2K15中: 2K139

F：「唔睇呀！去死啦！有得睇無得用重嬲。」
我：「哈哈，我以前真係諗住睇咗之後就會有得用。」
F：「無得用呀！你溝女咁廢，呢世都唔使指擬溝到女神呀！」其實我都有咁諗過，可能同露娜一齊對我嚟講先係最好，但只要同QQ一齊住我就乜都唔會諗。
我：「哎吔，唔玩籃球機蝦妳嘞，去睇下人夾公仔…」
F：「唓，夾公仔咁嘥錢，乜你都會夾㗎咩？」
我：「基本上就唔會夾嘅，嗱，不過呢，我識夾㗎，以前同啲波友嚟蒲，有陣時佢哋出錢我出力㗎嘛，橫掂我又唔會要啲公仔嘅，不過如果有死雞我會執。」
F：「哦，睇下囉，無壞嘅。」
其實自從周圍嘅商場同街鋪越開越多幫人分享喜悅嘅夾公仔鋪，呢啲綜合遊樂場嘅機就越嚟越少人玩，始終呢度機台比較少，啲公仔款式又更新得比較慢咁啦。
F：「呀！你睇下，係露娜呀！」
我：「啊，邊隻係露娜呀？」




F：「呢隻囉，你識唔識㗎，美少女戰士入面㗎！」
我：「我識呀，但呢度入面都無貓，小小兔就有。」
F：「即係唔識啦，隻貓識變做人㗎，黃衫黑髮呢個就係。」佢指住隻Q版嘅女仔，的確未見過。
我：「妳…好想要？」佢個樣已經答咗我。
F：「嗯，你覺得有無機呀？」
我：「機就實有嘅，但郁都未郁過，好貴㗎喎。」
F：「唔緊要啦，我出錢你出力，睇下夾唔夾到。」
個衰妹即刻唱咗五十蚊畀我，令我好大壓力。
我：「如果五十蚊就夾到，實大把人嚟夾啦…」
F：「你試咗先，夾唔到又唔會怪你嘅。」




咁我實夾嘅，我都鍾意玩。係傳統嘅一上即鬆三爪機嚟，唔會夾去個窿度，但只要將個爪偏移咁放落去，就每次都郁到半cm咁，簡單嚟講又係儲credit。
我：「根據呢兩下實驗，我諗最快都要十下先夾到，但係假如妳決定繼續夾嘅話，就要一直夾到佢跌為止。」
F：「咁繼續啦，五十蚊咪有十下囉。」
我：「十下係最理想，估計唔會超過廿下。」
F：「OK，我重有錢，你好似頭先射籃咁落力就得。」
我：「如果十下內夾到，妳以後要聽晒我話，唔准影響我同班女神嘅關係，增加我嘅壓力。」
F：「咁如果你廿下都夾唔到，我要你即刻同Queenie表白，如果失敗咗嘅話就要公平咁對待我。」
我：「呢個…我好難做喎，佢有仔我點成功？」
F：「有仔又點，搶返嚟囉，繼續追囉，只要佢重理你都有機會㗎，唔敢呀？我有無因為你拒絕而逃避呀？」