【士㞗彈系列】《她被寄宿到鹽水男孩的家中》2K15中: 2K140

我：「呢個…好大鑊㗎喎，衰咗實七國咁亂。」
F：「你有無咁廢呀，廿下都夾唔到，畀夠廿五下嘞。」
我：「咁…好啦，妳要祝我好運。」
F：「唔祝喎，俾我贏返一次得唔得，你估下我想要隻公仔多啲吖，定係食你兩個花生多啲？」
我：「唔好唔記得佢係女神嚟，隨時唔按章法出牌㗎，到時玩返妳轉頭嗰陣驚妳喊咋。」
F：「先唔會，有得玩落去即係重有機，未輸晒。」
點解啲女仔…果然個個都係想玩死我先安樂。
結果聽咗十四次低B音樂之後，隻公仔就跌咗落個窿。
F：「睇嚟你真係好憎我，一次都無失手過。」
我：「夾多咗就慣，次次都夾得起㗎啦。」




F：「咁巴閉你一開始又唔敢講廿下搞掂？咁無信心睇你點溝女神，算，有露娜鎖匙扣當安慰奬。」即刻扣落手袋。
我：「我都係為免情況失控，對妳同我嚟講係好事嚟。」
萬一女神嗰邊發爛，妳估下我重敢唔敢搵妳？
「Woo…Rainy days never say goodbye…」唔使攞電話出嚟我已經呆咗，其實QQ好少打電話畀我，只係因為太多廣告電話先幫我整咗個專屬鈴聲以防萬一。
就係佢哋樂器組比賽選曲嘅原曲。
我：「女神打嚟。」我望住部電話，再做咗個殊嘅手勢。
F：「估到…聽啦。」契妹應該唔會玩嘢掛…
我：「喂，做乜打畀我嘅？」
Q：「可唔可以而家嚟陪我做gym？」
我：「做gym？妳唔係拍緊拖咩…咁快完？」




Q：「唔好提，而家即刻過嚟得唔得？」
我：「可以，但我出咗街…可能要等一陣。」
Q：「我知你出咗街呀，咁快啲啦，bye。」
幾句就cut咗線，對我嚟講應該算係好事嚟？
F：「你又話成個今晚都係陪我嘅！」媽咪呀，點算？
我：「對唔住，聽佢語氣似係有啲事，我諗都係搵佢先比較好…咁啦，當我爭妳半晚，遲啲一定還返畀妳。」
F：「唔准還半晚呀！係還就還一晚。」又係嘅…
我：「咁當然啦，我而家送妳返屋企喇。」
F：「使唔使趕到咁呀，女神一打嚟就要仆到去咁。」
我：「我唔介意同妳坦白，佢對我嚟講真係好重要。」




F：「我知呀！原來你哋已經熟到咁…連你出咗街都知。」
我：「呢個…就簡單啦，佢打我屋企電話無人聽咪知。」
F：「哦，女神原來會無端端打去你屋企。」
我：「咁我自己一個住吖嘛…因為…我呢個鐘數成日用緊部手提電話嚟打機，佢唔想影響到我啫。」
F：「我都唔想阻住你打機，係咪可以攞你屋企電話。」
我：「無話唔得嘅，但佢都係好間中先會打嚟搵我。」
F：「你兩個，真係唔係已經偷偷喺埋一齊？」
我：「邊有咁易…真係唔係一齊。」