真·後現代末世純手寫校愛網小《交叉仔傳記》: 2K178

我：「有㗎，起碼有得俾你扑到考埋DSE…好喇好喇，唔再講，知你知衰激走埋個女朋友，咁…入返去溫書啦。」
「我…未食早餐，可唔可以…一齊食嘢？」佢突然之間變返好似啱啱識我嗰陣，所有動作都小心翼翼步步為營。
我：「可以呀，哈哈…如果唔係你頭先打電話畀我，我早就喺屋企食完嘢，真係俾你激到唔記得咗肚餓。」
「咁唔知，妳有無乜係特別想食㗎？」
我：「Arbor嘅燒牛肉…講笑咋，你已經好辛苦咁諗咗兩年我要食乜，今日你想食乜就食乜啦。」
「但我而家都無乜係特別想食。」
我：「咁如果我頭先唔聽你電話嘅話，你會食乜？」
「KFC掛…」佢指住公園對面馬路嘅KFC…「呀，或者嗰邊有間車仔麪，好似幾好味。」算佢知埞。
我：「咁就去食車仔麪啦。」
「但係車仔麪嘅話…妳真係OK吖嘛？一齊食㗎喎。」佢會咁講，因為試過帶我去啲好大油煙嘅茶餐廳，我又無乜胃口，所以嗌杯雜果冰再黑佢面就算，之後先食甜品。




我：「行啦，肚餓呀！再諗打你㗎。」
其實新蒲崗又真係有好多好嘢食嘅，佢帶我出返公園，經過第一間唔係，再轉多條街先係，原來係個補習死細路食開嗰間，我當然知道係必然好味，次次聞住佢食…
有時都覺得做死小孩先係最開心，交叉仔都差唔多…
「哈…呢度真係可以妳想點嗌就點嗌。」
我哋一人攞住一張MC紙，然後剔剔剔。
「錯咗岔返再改咪得囉，啲阿姐唔會read錯嘅…」
我：「我唔係改答案喎，我係加紙。」
「估唔到…以為妳淨係作文先至會加紙。」
我：「你要幫手食㗎喎，唔食飽啲邊有力溫書。」
我喺一碗三餸麪之上，又嗌多碟咖喱魷魚金錢肚豬皮淨餸走湯，三個餸先大約等於一對壽司嘅價錢。




而話咁快，我哋三碗嘢連埋兩杯嘢飲亦都嚟到。
「好似…平時無乜機會見妳咁樣食嘢。」
我：「係咪唔滿意先？最後一日女朋友係無乜儀態㗎喇…」只不過因為肚餓先食到雪雪聲咋嘛。
「點會，妳開心就好，乜都無所謂。」
簡簡單單就完成咗我哋嘅午餐，我亦都如約喺自修室開位陪佢溫書，我當然乜都無帶，所以佢就借咗啲Econ notes畀我睇，而佢亦都專心咁喺度溫書。