真·後現代末世純手寫校愛網小《交叉仔傳記》: 2K184

再者，如果佢媽咪知道嘅話，應該都會開心嘅。
「就嚟六點㗎喇，如果妳餓就同我講啦。」唉，不停喺度亂諗嘢嘥晒啲時間，差唔多一頁notes都未睇過咁滯。
我：「我未呀，如果你餓嘅話咪去食囉，唔使就我。」
「我都OK，咁食七點啦，就頭先經過嗰間泰菜好唔好？無謂行咁遠。」
我：「可以呀，你想食就得，但你之後重有嘢做咩？」
「無呀，都係想食完再返嚟溫多陣書。」
我：「哈，乜你平時有咁勤力嘅咩？唔多覺喎…」
「因為…八點後都唔知有乜好做，同妳去第二度又驚妳唔鍾意，既然妳肯陪我溫書…我想喺度見妳到尾。」
我：「你鍾意啦，我十二點前返到屋企就得。」
「妳咁夜先返到去，會唔會累妳俾屋企人鬧㗎？」




我：「唔會啦，我高中㗎喇，有時同班姐妹去玩都到十點十一點，預先同佢哋講定就無問題。」
我竟然覺得…同團長chat重舒服過同男朋友溝通，亦同講嘢嘅話題無乜關係，明知男仔係鹹濕㗎啦，所以如果可以順暢咁講淫嘢我都OK嘅，只要尊重我；不過呢個就肯定歸功團長呢咁多年嚟同女仔嘅相處，就係有呢種經驗，佢先可以同女班長嘴到天昏地暗而唔會尷尬。又或者，望住交叉仔衰衰格格笑口噬噬掀我裙底個死人樣，我就唔知好嬲定好笑，唔理佢又得，一拳車埋去又得，佢都無乜所謂，總好過要我回覆男朋友對我嘅洩慾要求…只係諗唔明換衫個陣任佢睇佢又唔睇，係要走嚟掀我條裙，男仔真係好無聊，不過有時都幾得意嘅。
諗落，其實我好少機會咁樣同男朋友拍拖，因為唔係讀同一間學校，亦唔算住得近，係佢開頭追我嗰陣先約埋喺同一間補習社補咗一個學期；其餘嘅相處，都係為拍拖而拍拖嘅居多，佢負責諗帶我去邊玩，食啲乜，幾時要慶祝同送禮物畀我，而我就負責做返一個乖巧同聽話嘅女朋友，等佢可以因擁有一個女神級女朋友而自豪…都無計，我同佢嘅性格以及興趣又唔可以話似，最後就變咗為扑而扑…
※※※※※
頂…結果食完幾塊餅就揸車到而家。由葡萄牙揸到愛沙尼亞，然後去咗土耳其又兜返去英國，最後上埋芬蘭，黃咗好多路都算有啲貢獻嘅…QQ無晒聲氣即係唔再嬲啦，按道理應該會和好嘅，無理由鬧一次大架就散咁兒戲㗎嘛，嗰陣我同細蚊都磨咗成個月佢先消失。又咁講，雖然唔關我事，但都唔睇好佢兩個嘅感情…無論財力抑或係實力條仔都配唔起QQ，不過維持膠著狀態對我嚟講都係無壞嘅，起碼QQ唔會主動去溝仔先吖嘛。