真·後現代末世純手寫校愛網小《交叉仔傳記》: 2K185

聽日去幽蘭家玩…之後就係聖誕節，嗯，雖然我人微言輕但係咪應該送禮物畀佢呢？然而佢鍾意嘅嘢我係絕對買唔起嘅，夾硬買多兩粒閃爧爧畀佢亦了無新意，加上上次幽蘭先送咗啲飾物畀佢…或者我可以問下易汪意見…
唔得喇，再唔落去買叉飯就閂門大吉，到時都唔知自己煮好定係返公司汁撈白飯好…
※※※※※
「畀妳揀先，係咪唔食熱氣嘢？」
我：「唔緊要啦，都最後的晚餐…我想試海南雞髀飯，要少少飯就得，其他你決定。」
最後佢再加咗蝦餅，燒豬頸肉，沙嗲串燒牛，炒通菜，冬陰公湯，重有龍眼冰同椰汁冰。
我：「嗌咁多食唔食得晒㗎，化悲憤為食量？」
「妳都識講最後一餐，而家唔食幾時食喎…難得呢度我重可以唔使計住數咁嗌，到得返自己一個人溫書嘅時候，食杯麪都得啦。」
我：「點得㗎，咁無營養個腦會運作唔到…你呢排少咗零用錢咩？同我出少咗街應該使少咗㗎。」
「主要都係補習費貴啫，喺我零用度扣返一部份填，同埋加息累事囉，唔係我控制到嘅嘢嚟。」




我：「聽日開始你唔使諗錢，專心讀書就得喇。」
「又唔係我想…其實，我已經預備咗今年嘅聖誕禮物，如果妳唔介意，臨走上嚟我門口攞畀妳？」
我：「我介意喎，到咗聖誕節我已經唔係你女朋友，無資格收你份禮物，亦唔會因為你份禮物而同你上多次床。」
「邊有呢個打算…妳唔收份禮物放喺度都唔知做乜。」
我：「梗係攞嚟溝女啦，如果係我鍾意嘅大把女受啦。」
「真係無乜對像，得返幾日無端端搵人送咩…」
我：「你嗰陣咪又係咁樣無端端走嚟搵我。」
「因為…對我嚟講妳實在太難忘，我唔捨得上完堂之後再見唔返妳，同埋…我而家邊有心機識女仔，坦白講同妳一齊之後，我連一個覺得值得出軌嘅對像都無。」
我：「你未認識一個女仔，所以先覺得無價值啫…嚟啦，食嘢先，等我吹下枝串燒再喂你呀下…呼…呼…」
可能因為澱粉唔多嘅關係，又真係食得晒無嘢剩。真心，呢度啲餐廳就算好味唔過啲大商場都一定抵好多。




「調返轉頭諗，我當初係無理由追到妳嘅…我而家面對住妳，完全無信心可以令妳幸福，我諗…妳心目中嘅合格男朋友，一定比我好太多太多。」
我：「唔好咁諗啦，你其實算係咁㗎喇…只係我…無辦法迷戀喺你身上，可能係我嘅問題嚟。」
「而且我重對妳咁差，激嬲咗妳…但無論係點，我都覺得妳係最完美嘅女仔嚟，我以後無可能再識到咁好嘅…」