真·後現代末世純手寫校愛網小《交叉仔傳記》: 2K186

我：「你而家梗係咁諗㗎，到你識到個真心愛你嘅女仔嗰陣，可能就會鬧你EX係個蠻不講理嘅八婆死港女㗎喇…」
「點會喎，至少妳嘅思想，個樣，同埋身材都係無人能敵…就算一個女仔對我幾好都無可能取代到妳喺我心中嘅地位，係嘞，妳好似從來無提起妳EX，乜人嚟？」
我：「再大你幾年…靚仔過你少少，又高你少少，嗰時啱啱入三大，仆街嚟，除咗想食我無任何貢獻…其實唔提好過，我當同佢玩㗎咋，喺埋一個月都無。」
「而佢係食唔到妳嘅？」
我：「梗係食唔到啦！你唔係以為我呃你係處呀？！」
「唔係，我想知佢衰乜啫…」
我：「衰…仆街囉，不值一提，唔好再講。」
「如果無咗佢嘅話，我會唔會當時就追唔到妳？」
我：「都有可能…應該咁講，嗰陣無一個比你更好嘅選擇，所以…咪試下囉，見你都有誠意。」
「我係咪應該多謝佢…結果之後…妳就俾我呃咗，其實我根本就畀唔到幸福妳，但就攞晒妳嘅所有嘢…」




我：「吖！而家重講啲咁嘅嘢，嬲㗎，快啲返去溫書！」
「係，係，重有最後個半鐘，多謝妳。」
而喺呢粒半鐘，我都終於睇咗少少Econ入腦…
「如果可以…俾我，最後一次…送埋妳返屋企。」
我：「唔使送我返屋企，不過跟我嚟啦。」圖書館閂十點，溫習日都終於嚟到曲終人散，時間係啱啱好。
「吓…去邊呀？而家咁夜…妳想？」
我：「問咁多做乜，你唔係不朽話聽晒女朋友話㗎咩？」
Band房同圖書館只係相隔兩條街，話咁快就捉咗佢上樓…時間嚟到十點十分，如果啲租客乖嘅應該已經走晒。
「我都知呢個鐘數啲工廈無乜人，但妳唔使迫自己…」
我：「咪咁多廢話啦，我先唔會同你喺條走廊度攪三攪四。」其實重有公廁，但都唔係好環境。




「呢度係…」我䚎條門罅，又哄隻耳仔埋去聽。
確認無人之後，我就直接㩒密碼開門行入去。原來啲租客都幾有手尾，識得自己熄燈熄冷氣，不過冬天嘅話其實開冷氣係為咗通風啫；另外大廳有啲USB擺設長明燈，所以入去閂門之後都未至於伸手不見五指。
我：「朋友開嘅band房，你唔好問咁多啦。」
呢度門口同大廳都有CCTV，唔理得佢有無夜視或者熱源偵測，總之就直接拉咗佢入錄音室，開埋裡面盞燈；我同班姐妹之前留意咗好耐間房係無cam嘅，可能…團長同佢啲partner都係為咗方便自己喺度玩。
我：「坐啦，做乜咁緊張。」