真·後現代末世純手寫校愛網小《交叉仔傳記》: 2K202

行到去大廳，見到佢個工人，已經唔記得咗叫乜名…
工：「小姐，同埋兩位同學仔，你哋想食啲乜呀？」
V：「唔使呀，妳今日係要放假㗎，快啲出去玩啦！」
工：「小姐，但係我無約人喎，妳又未食晏晝。」
V：「咁妳返房休息下啦，我哋今日自己搞掂。」
工：「小姐，妳得唔得㗎？上次用微波爐妳連火力都唔識調較，叮咗十分鐘都未夠熱…」真係諗唔明，佢physics咁高分，實驗又識做，點解會搞唔掂一粒扭扭制？
V：「咪再講呀！同埋…今日係佢負責我哋嘅午餐。」
工：「點可以咁㗎…要客人特登過嚟煮嘢畀妳食…」
V：「點會唔可以？佢好想煮嘢食畀我哋兩個㗎！」我幾時有講過…雖然一早就已經慣晒。
我：「係呀，放心，我會準備佢哋今日嘅午餐。」




工：「但係…你OK嘛？我可以喺隔籬幫你手嘅。」
我：「OK，平時我有煮開嘢食。」
V：「哎吔！都話無問題咯！快啲返入房休息呀！」
幾經辛苦，幽蘭終於推返個放假嘅工人入房。
而QQ就坐喺三角琴前面，打開個冚，彈起嗰首比賽嘅曲目…我愛吹蕭…係我愛蕭邦至啱，其實我對蕭邦呢個人零認識，剩係知香港有間雪廠用咗佢個名。
V：「太好喇，終於可以趕走晒啲人！」
明嘅，曾幾何時我都好想趕婆婆食完飯快啲返舅父屋企，為嘅就係…捉架車上嚟玩啲所有小朋友都鍾意嘅遊戲…
Q：「有好多人咩？最緊要妳父母唔得閒啫。」
V：「妳知唔知呀，我啱啱幾經辛苦先趕走咗個補習阿sir呀，明明都已經夠鐘㗎啦，重喺度講講講，都唔知咁盡責嚟做乜…呀，如果妳可以多啲幫我彈下部琴就好。」
Q：「唔好，如果日日對住佢就唔想彈㗎喇。」




V：「咁又係，所以易汪同Zilvia嚟親都會玩。」
Q：「好喇，我哋去廚房先，我同佢都未食早餐㗎。」
V：「咁快啲行啦，講到我都越嚟越肚餓喇。」總覺得如果日日對住佢哋，我就變咗個不折不扣嘅管家同工人。
又嚟到呢個大過我間屋嘅廚房連飯廳，無從入手。
V：「係呀，你兩個記住檢點啲呀，廚房係有CCTV。」
Q：「喂…做乜咁話我哋呀，明明一路都好正經。」
V：「點知你哋喎，可能食食下用嘴仔喂嘢食呢？」
Q：「我唔係團長，無呢啲喜好，不如妳首先自律啲，唔好失驚無神嘴呢條友。」
V：「乜喎，我見妳同佢玩得咁開心先玩埋一份咋嘛，妳都知我啦，又無拖拍，想搵個男仔陪我玩下都難。」
Q：「點同，我同佢一齊住，某程度上係屋企人嘅關係先會咁，妳咪亂咁搵仔玩呀，唔想見到妳俾人嚼完鬆喺度喊。」