真·後現代末世純手寫校愛網小《交叉仔傳記》: 2K203

V：「唓，妳咪又顧住拍拖，唔見妳喺度喊。」
Q：「我呢，就識得保護自己，唔會俾人亂嚟嘅，如果唔係我點同佢住到咁耐，第一日就俾佢溶咗啦。」
我：「咪講到我成個強姦犯咁得唔得？兩位靚女，不如講返要食啲乜先啦，我唔熟個架步㗎…」
V：「我都唔熟㗎喎，我剩係嚟攞零食同嘢飲。」
Q：「大佬，成個廚房喺晒度，你自己搞掂佢啦，唔係嘅話學乜人喺酒樓返工呀！」又講得幾有道理。
我：「咁都不如畀個方向我先吖，大概想食啲乜？」
V：「乜都得㗎，最緊要你識煮，簡簡單單，公仔麵都好呀，我幾鍾意食㗎，不過唔知有無…」
Q：「難得嚟到，唔好咁多澱粉，無其他要求。」
講咗等於無講，結果都係要自己摷個廚櫃同雪櫃。
有米…唔想煮，有禮盒裝竹昇麪，有麪粉…有包牛皮紙包住嘅意粉，唔同我用開嗰啲，百利阿姨我覺得好高級㗎喇，起碼已經係意大利做。就煮意粉啦，不過問題係要有調味料，得糖同鹽係唔夠嘅，最少都要有老抽先整到乾炒意粉，但問題係洋蔥韮菜芽菜呢啲邊度嚟？雖然我就唔太鍾意食…打開雪櫃尋寶，我諗最壞情況都係蒸返佢冰格入面啲即食食物。咦，有甖意粉醬喎，紅醬應該最易處理，雖然原則上鋪喺面就食得，但我極之厭惡咁處理…




之後到配菜，牛扒，比目魚…唔多識煮唔想嘥…和牛漢堡，就你啦，大虎蝦，唔錯喎，重有QQ最愛大轆腸，然後煮嘢食畀靚女點可以無植物呢，啱啱有包好貴嘅甘筍仔，而包蘆荀…望落唔多夾，放棄。
嗯，首先由意粉開始，煲水加鹽就入味啲兼彈牙啲，呢包粉粗過平時嗰啲，煮幾耐好呢？都係用個口嚟試。
佢個爐係四頭㗎，穩陣起見我都係逐樣嚟。
喺我烚緊粉嘅時候，QQ就走嚟雪櫃攞嘢飲，不過佢唔係是但攞一樣，而係左摷右摷…首先係黑罐梳打，然後貴價新鮮青檸汁，再嚟唔知邊度搵到枝蜜糖出嚟。
我：「嘩，妳落咁多蜜糖，唔驚甜得滯呀？」其實蜜糖唔係好貴，我屋企都可以有，但幽蘭屋企嘅又點會係平民級數，好明顯係窮人五寶唔會搵得到，即係759、大生、優品、價真棧、佳寶…
Q：「又好似係…吖，我唔阻住你煮嘢食畀壓力你，調返轉頭嚟質疑我沖嘢飲都有嘅。」佢喺熱水機沖開啲蜜糖，然後加冰，最後倒梳打同青檸汁。
我：「左攪右攪，睇嚟妳已經俾團長教壞咗。」
Q：「好明顯我同佢係品味相近，唔介意同佢做下壞事㗎，起碼夠靚仔先，嗱，呢杯係妳嘅。」