真·後現代末世純手寫校愛網小《交叉仔傳記》: 2K210

V：「嗰盒係藍莓芝士蛋糕味，我父母都鍾意食，所以買大兜裝囉，你如果要食就潷落個碗度。」
我：「未見過嘅，喺邊度可以買到？」
V：「我都唔知喎，可能要問管家或者工人。」
Q：「上網有得訂㗎，兩桶就包埋送貨，我阿媽都買過一次，結果食到驚咗成年唔使再食。」
我：「哈哈…好似我咁，日日對住妳哋幾個，重溝乜鬼女。」結果我摷到個雪糕挖整咗一大球出嚟，之後再攞多杯冧酒提子，本身想揀多款但都係陣間先再算。
V：「好開心呀，可以同你哋一齊食雪糕。」
我：「有乜咁特別，妳隨時打開雪櫃就有得食。」
V：「嗯…得我自己一個喺度，好少會攞嚟食。」
我：「如果妳唔食，做乜又買咁多嘅？」
V：「攞嚟招呼人吖嘛，佢哋之前上開嚟謦嘢嗰陣都一人一杯，我個港大補習哥哥，一個星期嚟一至兩次，每次最少食兩杯，佢話讀書好燒腦力要補充能量喎…其實我細個嗰陣都好鍾意食㗎，不過一食得多就會俾人鬧，而且都開始厭，所以上咗中學之後已經好少食。」




Q：「無咗個老母喺度做白癡嘢，我而家食得好開心。」
V：「嘻嘻，我見到你哋就會好開心…如果有一日，我父母可以唔返屋企，間屋無晒人，同你哋一齊住就好。」
Q：「妳諗下好喇，無人照顧妳，到時實好唔慣。」
我：「如果無咗管家嘅話，妳識唔識自己一個返學校？」
V：「嗯…可以出門口等的士，不過呢度唔係成日有的士經過，可能要學下點樣用call車App。」
Q：「唔使驚喎，妳打個電話畀我，即刻幫妳搞掂，係幫唔到妳畀錢啫。」
我：「其實妳出街會唔會帶現金㗎？」
V：「都會嘅，我識㩒錢㗎！㩒過幾次…乜的士唔收卡嘅咩？」我記得啲好串嘴嘅小朋友講過有錢人係唔會帶現金，因為係得啲窮撚幫襯嘅地方先會唔收卡。
Q：「的士轆卡？等多兩年先啦，講咗好幾年都重未實行到，同埋妳嗰張AE可以唔使諗，要用另一張。」
QQ雖然都曾經係有錢女，但確實比起幽蘭能幹好多，就連直播設備都可以一手一腳搞掂，係唔識煮嘢食同做家務啫…但神奇嘅地方係幽蘭嘅學業成績重好過QQ一截，雖然QQ都唔差，睇嚟請名師補習啲錢係無掉落鹹水海。




食完雪糕，幽蘭帶咗我同QQ去雜物房，即係樓下中廊兩邊其中一間房，喺工人房隔籬。入到去，左中右合共四排鋼架，類似IKEA近門口放貨嗰啲，每個架有四層高到上天花板咁滯，我好肯定徒手係無可能攞到最高嗰格，除非你係姚明。
Q：「嘩…我都係第一次嚟妳屋企間雜物房…」