真·後現代末世純手寫校愛網小《交叉仔傳記》: 2K214

我：「正常，我見到呢度有兩箱吸塵機，新定舊㗎？」
V：「答唔到你，可能係新，亦可能係display，又或者有人退貨，甚至乎唔見咗零件，換完貨供應商停止合作懶得收返都有可能。」
我：「來歷不明，唔會爆炸㗎可？」
V：「應該唔會，公司啲人驗過安全先會留起。」
Q：「你理得人哋部吸塵機吖，就算唔理價值，你唔係諗住要個學生放學托呢嚿嘢返屋企呀？」
我：「假設我抽到，我又唔介意喎，搬過對面樓啫。」
Q：「貪心，平時都唔覺你有幾勤力掃地拖地，而且咁大件嘢你諗住放邊？抱住佢嚟瞓呀？」
我：「重使問嘅，梗係即刻擰上去旋轉…變返錢啦。」
V：「唔得㗎！就算件嘢變咗垃圾都好，公司簽咗約係要搦去銷毀㗎，俾人發現賠都賠死你。」
Q：「睇下你幾市儈，成個腦都係錢嚟。」




我：「乜喎，唔係我貪錢囉，係想幫妳加餸咋嘛。」
Q：「我自己會諗辦法，唔使你擔心。」
我：「不過呢度咁多貨，全部賣得出起碼都值幾十萬。」
V：「係有一百幾十萬，但處理呢啲嘢好花精力㗎，你知唔知呀，有時啲車廠出錯，要回收處理隨時一架都唔見咗幾十萬啦。」點解佢哋識咁多嘢，但就連洗衣機洗碗機都唔識用，究竟係咪一件好事嚟？
Q：「咪咁多廢話，我哋係嚟搵禮物㗎，之後重有嘢做…」
我：「成間房咁多嘢，我哋應該由邊度開始好？」
V：「我諗由近門口，最高嗰層開始比較好…你望下嗰個膠箱，寫住digital，應該啱用。」
我：「高到咁，連我都捧唔到落嚟。」
V：「咁，你可以俾我騎膊馬，由我捧落嚟。」
我：「咪玩啦，嗰邊…唔係有嚿三級梯喺度咩…」




V：「人哋諗住畀個機會你表現男子氣概咋嘛。」
Q：「麻煩你哋唔好諗埋啲咁危險嘅嘢，跌親點算？」
V：「咪睇小我，我打個空翻落返嚟都重得。」
我：「大小姐，乜妳有咁犀利嘅咩，睇唔出喎。」
Q：「咪聽佢亂噏，唔該你快啲攞嚿梯埋嚟搬嘢。」
呢兩位大小姐，好似天生就點錯晒啲技能值咁…不過錯有錯著，QQ係曳曳呢方面簡直天賦一百，而幽蘭呢…
個箱…未算太重，但都唔輕，我一移出嚟佢哋兩個就喺側邊幫手托住個底，等我易啲行返落嚟。一打開個箱，入面全部都係透明膠盒嚟，我諗有幾百盒。
我：「嘩！咁多電話殼嘅！」
Q：「你要知道，呢個世界每生產兩個電話殼就有一個以上會即刻變垃圾，或者俾人買完長放，又或者直接送去堆填區。」言下之意，係咪每兩個人出世，就有一個以上係獻世…因為每經過一分鐘，非洲就有無數小朋友度過咗六十秒，無論佢哋得唔得到溫飽都好。